Ստրասբուրգում հոկտեմբերի 24-26-ին կանցկացվի Եվրոպայի խորհրդի տեղական և տարածքային իշխանությունների կոնգրեսի (ԵԽ կոնգրես) 45-րդ նստաշրջանը: Նստաշրջանի ընթացքում Կոնգրեսը կընտրի նոր նախագահ և Կոնգրեսի երկու պալատների նախագահներ ու փոխնախագահներ։

ԵԽ Կոնգրեսի նստաշրջանի օրակարգում է նաև սեպտեմբերի 17-ին տեղի ունեցած Երևան քաղաքի ավագանու ընտրությունների վերաբերյալ զեկույցը։ Նշենք, որ Կոնգրեսի ինը հոգանոց պատվիրակությունը սեպտեմբերի 15-18-ը դիտորդական առաքելությամբ Հայաստանում էր։ Այն դիտորդական առաքելություն իրականացրեց Երևանի 12 ընտրատարածքներում։

Կոնգրեսի օրակարգում է նաև տեղական և տարածաշրջանային իշխանությունների դերը Ուկրաինայի դեմ Ռուսաստանի Դաշնության պատերազմում հաշվետվողականության ապահովման գործում թեմայով բանավեճը, քննարկվելու են նաեւ ՌԴ-ում քաղաքական ակտիվիստների դեմ ճնշումներները և այլ հարցեր։  

Կոնգրեսի անդամները քննարկումներ կունենան այնպիսի թեմաների շուրջ, ինչպիսիք են տեղական և տարածքային ընտրված ներկայացուցիչների նկատմամբ բռնությունը, ռեգիոնների դերը էներգետիկ անցման գործընթացում, կայուն զարգացման նպատակներին հասնելը. տարածաշրջանային փորձ և քաղված դասեր, տեղական և տարածաշրջանային լրատվամիջոցներ. ժողովրդավարության պահպանողներ, համայնքային համախմբվածության պահապաններ և այլն։