Եվրոպայի խորհրդի Տեղական և տարածքային իշխանությունների կոնգրեսի ինը հոգանոց պատվիրակությունը սեպտեմբերի 15-18-ը դիտորդական առաքելությամն Հայաստանում է։ Այն դիտորդական առաքելություն կիրականացնի սեպտեմբերի 17-ին կայանալիք Երևանի ավագանու ընտրություններին՝ Երևանի 12 ընտրատարածքներում։

Կոնգրեսի պատվիրակությունը գլխավորում է Կառլա Դեժոնյեն (Բելգիա, ILDG): Նա հանդիպումներ կունենա Տարածքային կառավարման և ենթակառուցվածքների, Արդարադատության նախարարության, ինչպես նաև Կենտրոնական ընտրական հանձնաժողովի ներկայացուցիչների հետ։

Նախատեսված են նաև հանդիպումներ Կոնգրեսում Հայաստանի պատվիրակության, դիվանագիտական կորպուսի անդամների, ինչպես նաև տեղական և միջազգային հասարակական կազմակերպությունների ու լրատվամիջոցների ներկայացուցիչների հետ։ Կոնգրեսի պատվիրակությունը մտքերի փոխանակում կանցկացնի Երևանի ավագանու ընտրություններին մասնակցող քաղաքական կուսակցությունների ներկայացուցիչների և թեկնածուների հետ։

Ընտրությունների օրը Կոնգրեսի յոթ թիմեր պատահականության սկզբունքով կտեղակայվեն Երևանի բոլոր 12 վարչական շրջանների ընտրատեղամասերում՝ ընտրությունների ընթացքին հետևելու համար:

Դիտորդական առաքելության նախնական եզրակացությունների մասին հայտարարությունը պատվիրակության ղեկավարի կողմից կհրապարակվի Կոնգրեսի կայքում 2023 թվականի սեպտեմբերի 18-ին: