Փետրվարի 10-ին Ստրասբուրգում տեղի է ունեցել Եվրոպայի խորհրդի տեղական և տարածքային իշխանությունների կոնգրեսի (ԵԽ Կոնգրեսի) Բյուրոյի նիստը։ Կոնգրեսի Բյուրոյի նիստին մասնակցել է ԵԽ Կոնգրեսում հայկական պատվիրակության ղեկավար, Հայաստանի համայնքների միության նախագահ Էմին Երիցյանը։

Բյուրոյի նիստը սկսվել է մեկ րոպե լռությամբ՝ հարգելով Թուրքիայում երկրաշարժի զոհերի հիշատակը։ Բյուրոն և Կոնգրեսն իրենց ցավակցություններն ու աջակցությունն են հայտնել Թուրքիայում երկրաշարժի զոհերի ընտանիքներին։ Կոնգրեսը կոչ է արել հրատապ կերպով հումանիտար միջանցքներ բացել հյուսիսային Սիրիայի և Թուրքիայի միջև սահմանին։

Բյուրոն հավանություն է տվել Եվրոպայի խորհրդի ապագայի վերաբերյալ հանձնարարականի նախնական նախագծին։ Փաստաթղթում մանրամասն ներկայացվում է Կոնգրեսի ներդրումը Եվրոպայի խորհրդի պետությունների և կառավարությունների ղեկավարների 4-րդ գագաթնաժողովում, որը տեղի կունենա 2023 թվականի մայիսի 16-17-ը Իսլանդիայում՝ Ռեյկյավիկում։

Փաստաթուղթը նաև ներառված է ԵԽ Կոնգրեսի՝ մարտի 21-24-ը կայանալիք 44-րդ նստաշրջանի օրակարգում։ Նստաշրջանի օրակարգում է նաև ռուս-ուկրաինական պատերազմը: Բյուրոն այս առիթով հանդես կգա հայտարարությամբ՝ հիշատակելով պատերազմի մեկ տարին։ Բյուրոն իր խորը մտահագություններն է հայտնել նաև Ստամբուլի քաղաքապետ, ընդդիմադիր գործիչ Էքրեմ Իմամօղլուի ազատազրկման վերաբերյալ։

Բյուրոն հաստատել է ԵԽ Կոնգրեսի Մոնիտորինգի հանձնաժողովի նոր մանդատը զեկույց պատրաստել «Քաղաքապետերի ուղիղ ընտրությունները՝ որպես ժողովրդավարության տարածման և տեղական իշխանությունների ինքնավարության ապահովման գործիք» թեմայով։