Թբիլիսիում փետրվարի 20-ին անցկացվում է Տեղական տնտեսական զարգացման ֆորումը: Ֆորումին մասնակցում են Հայաստանի և Վրաստանի սահմանային համայնքների ղեկավարներ, քաղհասարակության ներկայացուցիչներ: 

Ֆորումի բացման արարողությանը ողջույնի խոսքով հանդես եկավ Վրաստանի տարածքային զարգացման և ենթակառուցվածքների նախարարի տեղակալ Մզիյա Գիորգոբիանին: Նախարարի տեղակալը նշեց. «Մեզ համար մեծ պատիվ է հյուրընկալել մեր բարեկամ, հարևան երկրի՝ Հայաստանի համայնքների ներկայացուցիչներին: Հայաստանի և Վրաստանի միջև միջսահմանային համագործակցությունը կարող է ունենալ մեծ արդյունավետություն թե′ տնտեսական զարգացման առումով, թե′ տեղական ինքնակառավարման ոլորտում: Միջսահմանային համագործակցության ոլորտում կարևոր է հատկապես քաղաքացիներին ծառայությունների մատուցումը: Այդ ծառայությունները պետք է լինեն բարձր որակի և միևնույն ժամանակ մատչելի ու հասանելի համայնքների բնակիչների համար»:

Ֆորումին ներկա է նաև ՄԱԿ-ի զարգացման ծրագրի մշտական ներկայացուցիչ Լուիզա Վինտոնին: Նա կարևորեց միջսահմանային համագործակցության համատեղ ծրագրերի և նախաձեռնությունների մշակումն ու իրագործումը: Ֆորումին մասնակցում է Հայաստանի համայնքների միության պատվիրակությունը՝ Միության նախագահ Էմին Երիցյանի գլխավորությամբ: Պատվիրակության կազմում են Վանաձորի քաղաքապետ Մամիկոն Ասլանյանը, Իջևանի քաղաքապետի ժ/պ Հայկ Ղալումյանը, Տաշիրի քաղաքապետ Էդգար Արշակյանը, Այրում համայնքի ղեկավար Արայիկ Պարանյանը, Կողբ համայնքի ղեկավար Արսեն Աղաբաբյանը, Նատալյա Լափաուրի, Եվրոռեգիո «Եվրոկովկաս», Ախթալայի Նուռիկ համայնքային կենտրոնի ներկայացուցիչ Վազգեն Խաչիկյանը: Ֆորումի նպատակն է Հայաստանի և Վրաստանի սահմանային համայնքների ղեկավարների, քաղհասարակության ներկայացուցիչների հետ քննարկել և մշակել միջսահմանային համագործակցության ծրագրեր, հասկանալ, թե ինչ տիպի համագործակցություն է անհրաժեշտ, որպեսզի օգտագործվեն համատեղ տնտեսական հնարավորությունները: