Մարտի 11-ին Երևանում անցկացվում են համայնքի ղեկավարների, ավագանու անդամների և համայնքային ծառայողների համար վերապատրաստումներ։

Հայաստանի համայնքների միության կողմից՝ Վիշեգրադ հիմնադրամ ֆինանսական աջակցությամբ իրականացվող «Համագործակցություն հանուն քաղաքների կայուն զարգացման. ընդհանուր մարտահրավերներ, ընդհանուր լուծումներ» ծրագրի շրջանակներում Լեհաստանի Պիլա քաղաքի քաղաքապետ, Սենատոր Պյոտր Գլովսկին ՀՀ ՏԻՄ ներկայացուցիչներին, համայնքային ծառայողներին ներկայացնում է Լեհաստանում տեղական ինքնակառավարումը, ներկայիս խնդիրները և ապագայի մարտահրավերները։ Պյոտր Գլովսկին ՀՀ ՏԻՄ ներկայացուցիչներին ներկայացրեց, որ իր համայնքում բնակվում է մոտ 73 հազար բնակիչ, բյուջեն 880 միլիոն եվրո է։  Հայաստանի համայնքների ղեկավարները հետաքրքրվեցին՝ ո՞րն է իրենց համայնքի հաջողության բանաձևը։ Նա նշեց, որ համայնքում մեծ կարևորություն են տալիս համայնքի բնակիչների ձայնի իրավունքին։

Պիլայի քաղաքապետն ասաց․ «Տարեցտարի զգում ենք, որ մարդիկ ավելի մեծ ձայնի իրավունք են ցանկանում ունենալ, ուզում են իրենց ազդեցությունն ունենալ որոշումների կայացման վրա»։

Պյոտր Գլովսկին հավաստիացրեց, որ մեծ կարևորություն են տալիս նաև համայնքի լոբբինգին՝ տարբեր երկրներում ներկայացնում են, թե ինչ հնարավորություններ ունի համայնքը, փորձում են համայնքը գրավիչ դարձնել մասնավոր սեկտորի համար։

Վերապատրաստման ընթացքում ՀՀ համայնքների ներկայացուցիչները լեհ գործընկերոջից հետաքրքրվեցին՝ բնակարանային ֆոնդի կառավարման, համայնքի բյուջեի տնօրինման, լիազորությունների, կենտրոնական իշխանության հետ հարաբերությունների հետ կապված հարցերով։

Ծրագրի գործընկերներն են Լեհաստանի քաղաքների ասոցիացիան, Սլովակիայի քաղաքների միությունը, Հունգարիայի տեղական իշխանությունների ազգային ասոցիացիան, Ռադլոյի քաղաքապետարանը։