«Ես գիտեմ, որ չկա ավելի զգայուն թեմա, քան տարածաշրջանային ինքնության հարցը, բայց մենք պետք է քննարկենք այն, որպեսզի օգնենք մարզերին իրենց ինքնությունը վերածել արժեքի»,- ԵԽ Կոնգրեսի Տարածաշրջանների պալատում ներկայացնելով «Տարածաշրջանային ինքնություններ. միասնության մեջ երկխոսության և բազմազանության խթանում» թեմայով զեկույցը նշեց ԵԽ Կոնգրեսի զեկուցող Կարլ Հայնզ Լամբերտզը:

Նշենք, որ հոկտեմբերի 25-ին Ստրասբուրգում մեկնարկել է Եվրոպայի խորհրդի տեղական և տարածքային իշխանությունների կոնգրեսի (ԵԽ Կոնգրես) 43-րդ նստաշրջանը:

Նստաշրջանին մասնակցում է հայկական պատվիրակությունը՝ պատվիրակության ղեկավար, Հայաստանի համայնքների միության նախագահ Էմին Երիցյանի գլխավորությամբ:

Կոնգրեսն ընդունել է տարածաշրջանների ինքնությանը վերաբերող զեկույցը, որի նպատակն է օգնել համայնքներին զարգացնել իրենց ինքնությունը՝ հարևանների հետ համագործակցության առումով բաց լինելու տեսանկյունից: Կոնգրեսի զեկույցը համայնքներին առաջարկում է գործիքակազմ, մեխանիզմներ «ապահովելու համար բազմազանություն և լարվածությունը կարգավորել խաղաղ ճանապարհով»: