Հայաստանի համայնքների միության գլխավոր տնօրեն Արմեն Հարությունյանը հանդիպել է Salar International-ի ծրագրերի գծով տնօրեն Լենա Ֆալկոնիի, Դիալոգ ծրագրի ղեկավար Հելենա Ադլեր-Քրոյթի, ինչպես նաև Հայաստանում Դիալոգ ծրագրի ղեկավար Վարսենիկ Մնացականյանի հետ։

Հանդիպման ընթացքում քննարկվել են Հայաստանի համայնքների զարգացմանն ու տեղական ինքնակառավարման համակարգի արդյունավետության բարձրացմանն ուղղված մի շարք հարցեր։ Կողմերը կարևորել են համայնքների կարողությունների և ռեսուրսների զարգացումը՝ հատկապես միջազգային համագործակցության ընդլայնման, փորձի փոխանակման և ժամանակակից կառավարման գործիքների ներդրման համատեքստում։

Առանձնահատուկ ուշադրություն է դարձվել համայնքների մարդկային ռեսուրսների զարգացմանը և մասնագիտական վերապատրաստումների կազմակերպմանը։ Քննարկվել են տարբեր թեմատիկ թրեյնինգների, կրթական ծրագրերի և մասնագիտական փոխայցերի հնարավորությունները, որոնք կարող են իրականացվել ինչպես Հայաստանում, այնպես էլ Շվեդիայում։ Նշվել է, որ նման նախաձեռնությունները կարող են նպաստել համայնքային կառավարման ոլորտում նոր գիտելիքների և միջազգային լավագույն փորձի ներդրմանը։

Հանդիպման մասնակիցները նաև անդրադարձել են համայնքների միջև միջազգային կապերի ամրապնդման կարևորությանը՝ ընդգծելով, որ նման համագործակցությունները հնարավորություն են ստեղծում ոչ միայն փորձի փոխանակման, այլև երկարաժամկետ գործընկերային հարաբերությունների ձևավորման համար։ Քննարկվել են այն ուղղությունները, որոնց շրջանակում հնարավոր կլինի մշակել համատեղ ծրագրեր՝ միտված համայնքների ինստիտուցիոնալ զարգացմանը, տեղական մակարդակում ծառայությունների արդյունավետության բարձրացմանը և համայնքային կառավարման համակարգի կատարելագործմանը։