«Համայնքներն արտակարգ դրության ժամանակ» խորագրի ներքո ներկայացնում ենք, թե կորոնավիրուսի կանխարգելման համար ինչ աշխատանքներ են կատարվում Լոռու մարզի Դսեղ համայնքում: 

Ներկայացնում ենք հարցազրույց համայնքի ղեկավար Գառնիկ Հովսեփյանի հետ:

-Այս օրերին ինչպե՞ս է ընթանում համայնքային կյանքը Դսեղում:

-Այս օրերին Դսեղում համայնքային կյանքն ընթանում է նորմալ հունով՝ զգուշանալով և պահպանելով արտակարգ դրության կանոնները։

-Համայնքում ի՞նչ միջոցառումներ են իրականացվում կորոնավիրուսի կանխարգելման համար:

-Համայնքում իրականացվում են կորոնավիրուսի կանխարգելման համար մի շարք աշխատանքներ: Կատարվում են իրազեկման աշխատանքներ: Միևնույն ժամանակ կատարվում են նաև կորոնավիրուսի կանխարգելման միջոցառումներ: Ախտահանվել են համայնքապետարանի շենքը, հանրային սննդի խանութները:

-Ի՞նչ ռեժիմով է աշխատում համայնքապետարանը արտակարգ դրության պայմաններում:

-Համայնքապետարանն աշխատում է արտակարգ ռեժիմով՝ անընդհատ հետևելով պաշտոնական լրահոսին, տեղեկացնելով համապատասխան կառույցներին և բնակչությանը։

-Ի՞նչ է արվում համայնքի երեխաների՝ առցանց ուսուցումն ապահովելու համար:

-Առցանց ուսուցման համար ուսուցիչները ծնողների և երեխաների հետ համատեղ, օգտվելով ժամանակակից տեխնոլոգիաների հնարավորություններից, իրականացնում են առցանց ուսուցում:

-Համայնքում գործո՞ւմ է արդյոք թեժ գիծ, որով համայնքի բնակիչները կարող են կորոնավիրուսին և առողջական խնդիրներին առնչվող՝ իրենց հուզող հարցերի մասին տեղեկատվություն ստանալ:

-Համայնքի բնակիչները գիտեն առողջապահության նախարարության թեժ գծի համարը, իսկ համայնքապետարանին դիմելու համար գործում է կայքում առցանց դիմելու հնարավորություն, ակտիվ է համայնքապետարանի ֆեյսբուքյան էջը, ինչպես նաև աշխտակազմի բոլոր աշխատակիցները հասանելի են մեր բնակչությանը ցանկացած հարցով։

-Համայնքն այս պահին հատկապես ո՞ր հարցում օգնության կարիք ունի:

-Համայնքն այս պահին կարիք ունի ախտահանիչ նյութերի, դիմակների, ձեռնոցների և էլեկտրոնային ջերմաչափների։

-Ձեր գնահատմամբ՝ համայնքներն այսօր պատրա՞ստ են դիմակայել կորոնավիրուսին:

-Համայնքն, ինչպես այսօր ամբողջ Հայաստանը, հնարավոր ամեն ինչ անում է դիմակայելու և հաղթահարելու կորոնավիրուսը: