Թբիլիսիում փետրվարի 20-ին անցկացվող Տեղական տնտեսական ֆորումին Վրաստանի տեղական իշխանությունների ազգային ասոցիացիայի (NALAG) փոխնախագահ Թամար Թալիաշվիլին ողջունեց հայ գործընկերներին և հայտնեց, որ մեծ պատիվ է Հայաստանի համայնքների միության գործընկերներին և Հայաստանի համայնքների ղեկավարներին հյուրընկալելը: 

Նա իր խոսքում անդրադարձավ Հայաստանի և Վրաստանի միջև միջսահմանային համագործակցության կարևորությանը: Այնուհետև խոսեց երկրում տեղական ինքնակառվարման ոլորտում տեղի ունեցող զարգացումներին: Նա նշեց. «Վրաստանում այսօր ապակենտրոնացման նոր ալիք է բարձրացել: Մեր ասոցիացիան պաշտպանում է այն սկզբունքները, որոնց կիրառումն ու ապահովումը նպաստում է տեղական ժողովրդավարությանը»:

Ֆորումին մասնակցում է Հայաստանի համայնքների միության պատվիրակությունը՝ Միության նախագահ Էմին Երիցյանի գլխավորությամբ: Պատվիրակության կազմում են Վանաձորի քաղաքապետ Մամիկոն Ասլանյանը, Իջևանի քաղաքապետի ժ/պ Հայկ Ղալումյանը, Տաշիրի քաղաքապետ Մհեր Արշակյանը, Այրում համայնքի ղեկավար Արայիկ Պարոնյանը, Կողբ համայնքի ղեկավար Արսեն Աղաբաբյանը, Նատալյա Լափաուրի, Եվրոռեգիո «Եվրոկովկաս», Ախթալայի Նուռիկ համայնքային կենտրոնի ներկայացուցիչ Վազգեն Խաչիկյանը: Ֆորումի նպատակն է Հայաստանի և Վրաստանի սահմանային համայնքների ղեկավարների, քաղհասարակության ներկայացուցիչների հետ քննարկել և մշակել միջսահմանային համագործակցության ծրագրեր, հասկանալ, թե ինչ բնույթի համագործակցություն է անհրաժեշտ, որպեսզի օգտագործվեն երկու երկրների տնտեսական հնարավորությունները: