Եվրոպայի խորհրդի Տեղական և տարածքային իշխանությունների կոնգրեսի (ԵԽ Կոնգրես) մշակութային ժառանգության կառավարման հարցերով զեկուցող Բարբարա Թոսը Ստրասբուրգում կայացած Մշակույթի նախարարների համաժողովին կարևորել է մշակութային ժառանգության կայուն կառավարումը՝ վստահեցնելով, որ այն կարող է միավորել եվրոպացիներին՝ համատեղելով նաև նրանց բազմազանությունը:

Նշենք, որ Կոնգրեսը հրապարակել է զեկույց «Մշակույթ՝ առանց սահմանների» վերնագրով, որտեղ ընդգծվում է մշակութային ժառանգության դերը՝ որպես կամուրջ քաղաքացիների և համայնքների միջև: Ըստ զեկույցի՝ համայնքապետարանները և ռեգիոնները կարող են մշակութային ժառանգությունն օգտագործել որպես ժողովրդավարական արժեքների տարածման միջոց՝ հանդուրժողականություն, երկխոսություն, փոխադարձ ընդունելիություն և մարդու իրավունքների պաշտպանություն: Զեկույցում ամրագրված է. «Այն նաև նրանց գործիքներ է տալիս մշակութային ժառանգության կայուն կառավարումը զարգացնելու համար, օրինակ՝ պաշտպանելով ոչ նյութական մշակութային ժառանգությունը»:

Միևնույն ժամանակ Կոնգրեսի զեկուցողը շեշտել է մշակութային ժառանգության փխրունությունը, հատկապես ճգնաժամային ժամանակներում, ինչպիսին է Covid-19 համաճարակը կամ վերջերս՝ Ուկրաինայի պատերազմը: Նա նշել է. «Քանի որ բնակչության զգալի մասը ստիպված է փախչել և բաժանվել իրենց համայնքներից, պատերազմը նաև սպառնալիք է ոչ նյութական ժառանգության համար, ինչպիսիք են տեղական սովորույթները և փոքրամասնությունների լեզուները»:

Համաձայն Կոնգրեսի զեկուցողի՝ մշակութային ժառանգությունը կարող է նպաստել հետճգնաժամային և հետկոնֆլիկտային վերակառուցմանը` բոլոր մակարդակներում՝ ներքևից վերև, կենտրոնական կառավարությունների աջակցությամբ կայուն և ներառական կառավարման միջոցով: