Մարտի 21-23-ը Ստրասբուրգում անցկացվող Եվրոպայի խորհրդի տեղական և տարածքային իշխանությունների Կոնգրեսի (ԵԽ կոնգրես) 44-րդ նստաշրջանի ընթացքում միաձայն ընդունվել է Ուկրաինայի դեմ Ռուսաստանի պատերազմի մեկամյա տարելիցին նվիրված հռչակագիր: Այն ներկայացրել է Կոնգրեսի նախագահ և Ուկրաինայի դեմ Ռուսաստանի պատերազմի մասին զեկուցող Լինդերտ Վերբիկը։

ԵԽ Կոնգրեսի նստաշրջանին մասնակցում է ՀՀ պատվիրակությունը՝ Հայաստանի համայնքների միության նախագահ, ԵԽ Կոնգրեսում հայկական պատվիրակության ղեկավար Էմին Երիցյանի գլխավորությամբ։

Լինդերտ Վերբիկը հայտարարել է՝ Կոնգրեսի հռչակագիրն այս դաժան պատերազմի դատապարտման հստակ ուղերձ է և Կոնգրեսի անսասան համերաշխության վճռական վերահաստատում Ուկրաինայի, նրա ժողովրդի և համայնքների նկատմամբ. «Մենք պետք է շարունակենք ցույց տալ մեր ուկրաինացի ընկերներին, գործընկերներին և ընտրված առաջնորդներին, որոնք պայքարում են իրենց կյանքի, իրենց քաղաքացիների, իրենց քաղաքների և ապագայի համար, որ նրանք մոռացված չեն: Մենք՝ մեր ուժերի սահմաններում հիմա և ապագայում կանենք ամեն ինչ նրանց աջակցելու նրանց»: Նախագահ Վերբիկը նաև շեշտել է, որ հռչակագիրը վերահաստատում է Կոնգրեսի վճռական աջակցությունը Ուկրաինայի ինքնիշխանությանը, քաղաքական անկախությանը և տարածքային ամբողջականությանը նրա՝ միջազգայնորեն ճանաչված սահմաններում:

Բանավեճին նախորդել է Ուկրաինայի մարդու իրավունքների հանձնակատար Դմիտրի Լյուբինեցի տեսաուղերձը։

Նշենք, որ Կոնգրեսի լիագումար նիստի օրակարգում նաև ներառված են թեմատիկ բանավեճեր «Շրջակա միջավայրի պաշտպանության տարածաշրջանային ռազմավարություններ», «Քաղաքների և շրջանների դիմակայունությունը բազմաթիվ ճգնաժամերի պայմաններում», «Ամուր ժողովրդավարություններ տեղական մակարդակում երիտասարդների ներգրավման միջոցով» և «Ուղիղ ընտրություն» թեմաներով բանավեճեր։ Նաև կկազմակերպվի քննարկում «Արդյոք տեղական շահերը բավականաչափ ներկայացվա՞ծ են խորհրդարանների երկրորդ պալատի միջոցով» թեմայով։

Օրակարգ