Նոյեմբերի 19-ին տեղի է ունեցել Եվրոպայի խորհրդի տեղական և տարածքային իշխանությունների կոնգրեսի (ԵԽ Կոնգրես) Կառավարման հանձնաժողովի նիստը հիբրիդային եղանակով:

Հանձնաժողովի անդամները քննարկել են «Ընտրություններից դուրս. խորհրդակցական մեթոդների կիրառում եվրոպական մունիցիպալիտետներում և շրջաններում» թեմայով զեկույցը:

Այն ներկայացրել է զեկուցող Կարլ Հեյնզ Լամբերտը: Նշենք՝ հնարավոր է փաստաթուղթը ներառվի նաև Կոնգրեսի գարնանային նստաշրջանի օրակարգում:

Զեկուցողն ընդգծեց, որ խորհրդակցական մեթոդները, որոնցում ներգրավված են պատահականորեն ընտրված քաղաքացիները՝ իշխանություններին առաջարկություններ անելու համար «քաղաքացիների վիճակախաղի» միջոցով, դա ներկայացուցչական ժողովրդավարություն է: Խորհրդակցական մեթոդների ավելի հաճախ կիրառումը պատասխան է ժողովրդավարական ինստիտուտների և քաղաքական գործընթացների նկատմամբ քաղաքացիների վստահության ճգնաժամին:

Զեկույցն ընդգծում է լավ փորձի պատկերավոր օրինակներ և ուղեցույցներ է տրամադրում քաղաքապետարաններին և ռեգիոններին ներառյալ փոքր համայնքներին: Այն բացատրում է հաջող խորհրդակցական գործընթացի հիմնական սկզբունքները: