Դեկտեմբերի 5-ին Ստրասբուրգում տեղի է ունեցել Եվրոպայի խորհրդի տեղական և տարածքային իշխանությունների կոնգրեսի Բյուրոյի նիստը։

Բյուրոյի օրակարգային հարցերի շարքում քննարկվել է նաև 2023-ի մայիսին Իսլանդիայում՝ Ռեյկյավիկում կայանալիք Եվրոպայի խորհրդի պետությունների և կառավարությունների ղեկավարների 4-րդ գագաթնաժողովին վերաբերող կազմակերպչական հարցեր։

Բյուրոն հաստատել է ԵԽ Կոնգրեսի 44-րդ նստաշրջանի օրակարգը։ ԵԽ Կոնգրեսի Տեղական իշխանությունների պալատի նախագահ Բերն Վոհրինգերը և Ռեգիոնների պալատի նախագահ Հարալդ Սոնդերեգգերը պետք է պատրաստեն զեկույց ԵԽ-ի ապագայի և Կոնգրեսի ներդրման մասին։

Տեղական իշխանությունների պալատի առաջին փոխնախագահ Խավիեր Կադորեն և Ռեգիոնների պալատի առաջին փոխնախագահ Գան Մարի Հելգեսենը նշանակվել են կայուն զարգացման նպատակների տեղայնացման հարցերով համազեկուցողներ։

Բյուրոյի նիստի ընթացքում հատկապես կարևորվել է կապը ԵԽ Կոնգրեսի և ԵԽ Նախարարների կոմիտեի միջև, ինչը կուժեղացնի Եվրոպայի խորհրդի մարմինների միջև համահունչ գործակցությունը։

Կարևորվել է նաև ԵԽ Կոնգրեսի 4-րդ գագաթնաժողովի անցկացման հարցում տեղական իշխանությունների ներդրումը՝ նրանց ձայնն ու ներդրումը բերելով մարդու իրավունքների, ժողովրդավարության և օրենքի գերակայության ոլորտներում։

Բյուրոյի նիստի ժամանակ նաև կարևորվել է ռեգիոնների և տեղական իշխանությունների ներկայացվածության ուժեղացման հարցը։