Եվրոպայի խորհրդի տեղական և տարածքային իշխանությունների կոնգրեսի (ԵԽ Կոնգրես) գլխավոր քարտուղար Մաթյու Մորին Ալբանիայում՝ Տիրանայում կազմակերպված Տեղական ինքնակառավարման ֆորումի ընթացքում «Կանաչ քաղաքներ. ավելի կանաչ պրակտիկա և քաղաքականություն» թեմայով իր ելույթի ընթացքում կարևորել է բնապահպանական հարցերում քաղաքների և ռեգիոնների դերն ու պարտականությունները:

Նա մատնանշել է Կոնգրեսի աշխատանքը այս ոլորտում և նշել Եվրոպական քաղաքային խարտիայի առաջիկա վերանայումը, որը կընդունվի Կոնգրեսի առաջիկա նստաշրջանում։ Նա կոչ է արել քաղաքապետերին կատարել իրենց դերը՝ ապահովելու, որ քաղաքային կառավարման սկզբունքները, որոնք ամրագրված են Խարտիայի մեջ, պահպանվեն ողջ տարածաշրջանի քաղաքներում և բնակավայրերում: ԵԽ Կոնգրեսի քարտուղարը մասնավորապես հայտարարել է․ «Բնապահպանական հարցերում քաղաքների և ռեգիոնների դերն ու պարտականությունները հստակորեն ճանաչված չեն շատ երկրներում, մինչդեռ ազգային և միջազգային կլիմայական ծրագրերը կարող են հաջողակ լինել միայն այն դեպքում, եթե դրանք իրականացվեն տեղական մակարդակում»։ Մաթյու Մորին նաև կարծիք է հայտնել, որ այսպիսի ֆորումները գլոբալ ճգնաժամերի՝ ինչպես օրինակ՝ կլիմայի փոփոխության դեմ պայքարի լավագույն փորձի փոխանակման լավ հարթակ են։