«Քաղաքային դիվանագիտությունը կարևոր գործիք է քաղաքի իշխանությունն օգտագործելու համար՝ իրադարձությունների ընթացքի վրա ազդելու և այսօրվա ճգնաժամերին արձագանքելու համար»,- հայտարարել է Եվրոպայի խորհրդի տեղական և տարածքային իշխանությունների կոնգրեսի (ԵԽ կոնգրես) հասարակական էթիկայի գծով խոսնակ Վլադիմիր Պրեբիլիչը՝ B40 Բալկանյան քաղաքների ցանցի՝ Աթենքում հունվարի 24-ին կայացած գագաթնաժողովի փակման արարողության ժամանակ։ 

Գագաթնաժողովին մասնակցել են ավելի քան 69 համայնքների ղեկավարներ 10 երկրներից։ Նրանց նպատակն է սահմանել ընդհանուր ընթացակարգեր բալկաններում կայունության և խաղաղության հաստատման համար։

ԵԽ Կոնգրեսի խոսնակն այս առումով կարևորել է երկրներում ավելի ուժեղ բազմաստիճան կառավարումը՝ Տեղական ինքնակառավարման եվրոպական խարտիայի սկզբունքներին համաձայն։ Նա ներկայացրել է Կոնգրեսի աշխատանքը, մասնավորապես՝ 2008 թվականին ընդունված բանաձևը և առաջարկությունը քաղաքային դիվանագիտության գործունեության վերաբերյալ, որոնք կոչ են անում և՛ տեղական իշխանություններին, և՛ ազգային կառավարություններին օգտագործել քաղաքային դիվանագիտությունը՝ աջակցելու երկխոսությանը և հակամարտությունների կարգավորմանը:

Կոնգրեսի խոսնակը նաև մատնանշել է, որ տեղական և տարածաշրջանային իշխանությունները դարձել են քաղաքական ուժ, որի հետ պետք է հաշվի նստել՝ որպես իրենց համայնքների զարգացման լիարժեք քաղաքական խաղացողներ: Նա նշել է․ «Մարտահրավերները, որոնց բախվում են Եվրոպան և աշխարհը, բնույթով գնալով ավելի ընդլայնված են դառնում, պահանջում են ավելի լայն լուծումներ և, հետևաբար, սերտ փոխգործակցություն կառավարության բոլոր մակարդակների միջև»։

Այս առիթով նա հիշեցրել է, որ Կոնգրեսը սկսել է մտածել քաղաքային կառավարման սկզբունքները հարմարեցնելու ուղիների շուրջ՝ ի պատասխան քաղաքային կյանքի կարիքներին այսօրվա վերափոխումների դարաշրջանում՝ Կոնգրեսի Եվրոպական քաղաքային խարտիայի ընթացիկ վերանայմամբ:

Վլադիմիր Պրեբիլիչը, փաստելով, որ բազմաթիվ մարտահրավերների պայմաններում հասարակությունը ստիպված է ձևավորել ավելի ուժեղ ճկունություն, ճգնաժամերը կանխելու, դիմակայելու և հարմարվելու կարողություն, ինչպես նաև արագ հետ վերադառնալու կարողություն, համոզմունք է հայտնել․ «Մենք համոզված ենք, որ ճկուն քաղաքներն ու շրջանները աշխարհում խաղաղ, ապահով և համահունչ ապագա կառուցելու կարևորագույն մասն են կազմում»։