«Ոչ բոլոր երկրներն են տեղական ինքնակառավարման օրը նշում որպես ազգային օր: Սա անելով և ապակենտրոնացման վերաբերյալ բաց քննարկում սկսելով՝ Հայաստանը ցույց է տալիս տեղական համայնքներում ժողովրդավարության ամրապնդման իր պատրաստակամությունը»,- նշել է Կոնգրեսի նախագահ Գուդրուն Մոլսեր-Թյորնսթրոմը Երևանում նոյեմբերի 10-ին կայացած Տեղական ժողովրդավարության համաժողովի բացման ժամանակ:

«Հայաստանում արդեն ավելի քան 2 տարի է, ինչ ընթանում է վարչատարածքային բարեփոխում, որը հանգեցրել է երկրի տարածքային կառուցվածքի փոփոխությունների»,- ասել է նա՝ ընդգծելով Կոնգրես-Հայաստան համագործակցության դրական արդյունքները: Նա, մասնավորապես, ընդգծել է պարբերական երկխոսությունը՝ Կոնգրեսի մոնիթորինգային ընթացակարգերի միջոցով, համագործակցությունը այս ոլորտում և Կոնգրեսի առաջարկությունների կատարման վերաբերյալ ճանապարհային քարտեզի ստորագրումը: «Մենք տեսնում ենք տեղական ինքնակառավարման մասին օրենք և հարակից օրենքներ, մասնավորապես, կապված տեղական ֆինանսական միջոցների հետ, որոնք կարևոր քայլեր են այդ ճանապարհային քարտեզի կյանքի կոչման ճանապարհին»:

Կոնգրեսի նախագահը կրկին նշել է երկու կարևոր հարցերի կարևորության մասին, որոնք «տեղական ինքնակառավարման արդյունավետ իրականացման անքակտելի մասն են կազմում». բարեփոխումը պետք է ներառի տեղական իշխանությունների համար լիազորությունների և ֆինանսական միջոցների ապակենտրոնացում, և ընդհանուր հետաքրքրություն ներկայացնող հարցերի վերաբերյալ պետք է լինեն պարբերական խորհրդակցություններ կենտրոնական և  տեղական իշխանությունների միջև:

«Կոնգրեսը շարունակում է մնալ Հայաստանի հավատարիմ գործընկերը, ով Հայաստանի իշխանությունների հետ միասին սերտորեն ներգրավված է տեղական ժողովրդավարության ամրապնդման գործում»,- եզրափակել է Կոնգրեսի նախագահը: