«Ներկայիս ժողովրդավարական ճգնաժամի իրավիճակում մեր կարծիքով՝ տեղական հաստատություններն ունեն ռազմավարական դերակատարություն վերականգնել կապը քաղաքացիների և այն  հաստատությունների միջև, որոնք ներկայացնում են նրանց». սա Եվրոպայի խորհրդի (ԵԽ) Տեղական և տարածքային իշխանությունների կոնգրեսի անդամների ուղերձն է՝  ուղղված 47 անդամ երկրների ԱԳ նախարարներին, որոնք մայիսի 16-17-ին հանդիպելու են Հելսինկիում և նախարարական հավաքի շրջանակներում քննարկելու ԵԽ-ի ապագան:

Ապրիլի 2-ին Ստրասբուրգում մեկնարկեց Եվրոպայի խորհրդի Տեղական և տարածքային իշխանությունների կոնգրեսի 36-րդ նստաշրջանը: Կոնգրեսի աշխատանքներին մասնակցում է հայկական պատվիրակությունը՝ Հայաստանի համայնքների միության նախագահ Էմին Երիցյանի գլխավորությամբ: Նստաշրջանն անցկացվում է «Քաղաքապետերը՝ ժողովրդավարության երաշխավոր» խորագրով:

Ապրիլի 2-ին ԵԽ կոնգրեսը, որը ներկայացնում են 47 անդամների 150.000 տեղական իշխանությունների ներկայացուցիչներ, լիագումար նիստի ընթացքում ընդունեց առաջարկությունների փաթեթ:

Կոնգրեսի անդամներն ընդգծում են, որ տեղական ժողովրդավարությունը եվրոպական ժողովրդավարության կենտրոնական հենասյունն է, և համայնքային ցանցն այն օղակն է, որի շնորհիվ հնարավոր է պահպանել սոցիալական կապերն ու քաղաքացիների վստահությունը:

Կոնգրեսի անդամների առաջարկությունները պարունակող փաստաթղթի եզրափակիչ հատվածում ամրագրված է. «Այսօր, ինչպես երբեք, իշխանության հավասարակշռության եվրոպական մոդելի պահպանումը պահանջում է ժողովրդավարության մակարդակի բարձրացում եւ նոր սոցիալ-տարածքային դաշնագրի ձեւավորում»: