Հայաստանի համայնքների միության գլխավոր տնօրեն Արմեն Հարությունյանը առցանց հանդիպում ունեցավ Հայաստանի տարբեր համայնքների PR պատասխանատուների և տեղեկատվական ու հաղորդակցական գործառույթներ իրականացնող մասնագետների հետ։ Հանդիպման նպատակն էր ամրապնդել համայնքների և Միության միջև համագործակցությունը, ձևավորել առավել համակարգված հաղորդակցություն և խթանել համայնքային նորությունների ու նախաձեռնությունների առավել ակտիվ ներկայացումը։

Հանդիպման ընթացքում քննարկվեցին համագործակցության նոր ձևաչափեր, որոնց միջոցով համայնքները հնարավորություն կունենան առավել պարբերաբար ներկայացնելու իրենց ծրագրերը, նախաձեռնությունները, հաջողություններն ու համայնքային կյանքի կարևոր իրադարձությունները։ Արմեն Հարությունյանը կարևորեց տեղեկատվության ժամանակին և արդյունավետ տարածումը՝ ընդգծելով, որ յուրաքանչյուր համայնքի ակտիվությունն ու տեսանելիությունը մեծ նշանակություն ունեն ինչպես տեղական զարգացման, այնպես էլ միջհամայնքային փորձի փոխանակման տեսանկյունից։

Միության գլխավոր տնօրենը նշեց, որ Հայաստանի համայնքների միությունը պատրաստ է աջակցել համայնքներին հաղորդակցության, տեղեկատվության տարածման և մասնագիտական այլ հարցերում՝ ապահովելով մշտական կապ և համագործակցային միջավայր։ Նա կոչ արեց համայնքների ներկայացուցիչներին լինել առավել ակտիվ, պահպանել սերտ կապ Միության հետ և շարունակաբար ներգրավվել համատեղ ծրագրերում ու նախաձեռնություններում։

Հանդիպման ընթացքում ներկայացվեցին նաև Միության նոր ծրագրերը, առաջիկա նախաձեռնությունները, ինչպես նաև հանրային կապերի նոր մասնագետն ու թարմացված թիմը, որոնք այսուհետ ավելի համակարգված կերպով կհամագործակցեն համայնքների հետ։

Ընդգծվեց, որ նման հանդիպումները կրելու են շարունակական և պարբերական բնույթ՝ նպաստելով համայնքների միջև համագործակցության խորացմանն ու տեղեկատվական աշխատանքի արդյունավետության բարձրացմանը։ Նախատեսվում են նաև այցեր տարբեր համայնքներ՝ տեղում խնդիրներին, նախաձեռնություններին և զարգացման ծրագրերին առավել մոտիկից ծանոթանալու նպատակով։