Հայաստանի համայնքների միության գլխավոր տնօրեն Արմեն Հարությունյանը մայիսի 20-21-ին Մոլդովայի Քիշնև քաղաքում մասնակցելու է Արևելյան գործընկերության տարածաշրջանում Քաղաքապետերի դաշնագրի 15-ամյակին նվիրված բարձր մակարդակի համաժողովին։

Երկօրյա համաժողովը կհամախմբի շուրջ 200 համայնքների ներկայացուցիչների, Եվրոպական միության և ազգային կառույցների, ինչպես նաև միջազգային գործընկերների՝ քննարկելու տարածաշրջանում կլիմայական և էներգետիկ քաղաքականության ոլորտում արձանագրված ձեռքբերումներն ու նախանշելու հետագա քայլերը։

Ծրագրի շրջանակում նախատեսված են բարձր մակարդակի քննարկումներ կլիմայական չեզոքության, էներգետիկ անցման, դիմակայունության և ԵՄ ինտեգրման թեմաներով, ինչպես նաև գործնական աշխատաշրջաններ՝ նվիրված նորարարական լուծումներին և համայնքների կայուն զարգացմանը։

Համաժողովը կավարտվի Mimi Castel Zero Emission Resort այցելությամբ, որը համարվում է CO₂ արտանետումների նվազեցման, էներգաարդյունավետության և կլիմայական հարմարվողականության հաջողված օրինակ։

Միջոցառմանը մասնակցելու հնարավորություն ունեն այն համայնքները, որոնք մշակել են Կայուն էներգետիկ և կլիմայական գործողությունների ծրագրեր (SECAP), ինչպես նաև վերջերս միացել են «Քաղաքապետերի դաշնագիր Արևելք» նախաձեռնությանը։ Հայաստանը ներկայացված կլինի ծավալուն պատվիրակությամբ։