Հայաստանի համայնքների միության նոր նախաձեռնության շրջանակներում «Համայնքներն արտակարգ դրության ժամանակ» խորագրի ներքո ներկայացնում ենք տեղեկություններ Արթիկ համայնքում կորոնավիրուսի կանխարգելման համար իրականացվող աշխատանքների վերաբերյալ:

Համայնքում կատարվող աշխատանքների մասին մանրամասներ է ներկայացնում Արթիկ համայնքի ղեկավար Մխիթար Վարագյանը:

-Այս օրերին ինչպե՞ս է ընթանում համայնքային կյանքն Արթիկում:

-Մեծամասամբ ազգաբնակչությունը հետևում է կորոնավիրուսի տարածման կանխարգելմանն ուղղված միջոցառումներին, ինչը բերում է կյանքի բնականոն ռիթմի փոփոխությունների: Արթիկցիները զգուշավոր են, սոցիալական բարձր պատասխանատվությունը, ինչպես նաև կանխարգելիչ միջոցառումները, կարծում եմ, կապահովագրեն  կորոնավիրուսի թափանցումը համայնք:

-Համայնքում ի՞նչ միջոցառումներ են իրականացվում կորոնավիրուսի կանխարգելման համար:

-Մարտի 16-ին իմ հանձնարարականով ձևավորվեց օպերատիվ շտաբ, որտեղ որոշում կայացվեց իրականացնել կանխարգելիչ մի շարք միջոցառումներ. հանձնարարվեց դադարեցնել սննդի բացօթյա առևտուրը, ժամանցի և հարսանյաց սրահներին հրահանգվեց դադարեցնել իրենց գործունեությունը, որոշվեց պարբերաբար ախտահանել աղբարկղերը, հասարակական տրանսպորտի և տաքսի ծառայություններ իրականացնող վարորդներին հորդորել ենք ամեն օր ախտահանել մեքենաները, պատվիրել ենք մեծ թվով պաշտպանիչ դիմակներ, որոնք բաժանելու ենք մեր քաղաքացիներին:

-Ի՞նչ ռեժիմով է աշխատում համայնքապետարանը արտակարգ դրության պայմաններում:

-Մենք աշխատում ենք խստացված ռեժիմով, քաղաքացիներին կոչ ենք արել միայն հրատապ հարցերով դիմել համայնքապետարան և առհասարակ տանից դուրս գալ՝ միայն խիստ անհրաժեշտությունից ելնելով: Դիմումները քաղաքացիներից ընդունում ենք օնլայն տարբերակով, հորդորել ենք մեր քաղաքացիներին հետաձգել շինարարության հետ կապված իրենց ծրագրերը:

-Համայնքում գործո՞ւմ է արդյոք թեժ գիծ, որով համայնքի բնակիչները կարող են կորոնավիրուսին և առողջական խնդիրներին առնչվող՝ իրենց հուզող հարցերի մասին տեղեկատվություն ստանալ:

-Օպերատիվ շտաբի, համայնքապետարանի հեռախոսահամարները տրամադրվել են բնակիչներին, բայց ասեմ, որ կորոնավիրուսով վարակվածության կասկածի դեպքում քաղաքացիները նախապատվությունը կտան դիմել շտապօգնություն:

-Համայնքն այս պահին հատկապես ո՞ր հարցում օգնության կարիք ունի:

-Մեզ համար այս պահի դրությամբ առաջնահերթության հարց է դիմակների ձեռքբերումը, պատրաստ ենք նաև տեղում պաշտպանիչ դիմակներ կարել, եթե մեզ տրամադրվի անհրաժեշտ հումք:

-Ձեր գնահատմամբ՝ համայնքներն այսօր պատրա՞ստ են դիմակայելու կորոնավիրուսին:

-Դիմակայելն այս պահի դրությամբ կանխարգելիչ միջոցառումների արդյունավետ իրականացնումն է: Այս պահին ոչ միայն  համայնքում, այլև ողջ հանրապետությունում խնդիր ունենք իրազեկվածության բարձրացման, պաշտպանիչ միջոցների ձեռքբերման հարցում: Համաճարակի դեպքում միայն մեր ուժերով անհնար է իրականացնել լիարժեք դիմադրություն: