Փետրվարի 10-ին տեղի է ունեցել Եվրոպայի խորհրդի տեղական և տարածքային իշխանությունների կոնգրեսի (ԵԽ Կոնգրես) Ընթացիկ հարցերի հանձնաժողովի նիստը:

Նիստին մասնակցել են նաև ԵԽ Կոնգրեսի փոխնախագահ, Կոնգրեսում հայկական պատվիրակության ղեկավար, Հայաստանի համայնքների միության նախագահ Էմին Երիցյանը և ԵԽ Կոնգրեսում հայկական պատվիրակության անդամ, Երևանի ավագանու «Լույս» խմբակցության ղեկավար Դավիթ Խաժակյանը:

Հանձնաժողովը քննարկել է, թե ինչ դերակատարություն ունեն տեղական իշխանությունները մարդու իրավունքների պաշտպանության, ԼԳԲՏ անձանց նկատմամբ ատելության խոսքի և խտրական վերաբերմունքի բացառման հարցում:

Զեկուցողները շեշտել են՝ տեղական իշխանությունների դերակատարությունն այս հարցում մեծ է և թիրախային: Նրանք մտահոգություն են հայտնել, որ Եվրոպայի տարածքում հատկապես մեծ տարածում ունի ատելության խոսքը:  

Կոնգրեսի զեկուցողները շեշտել են՝ տեղական իշխանությունները պետք է մշակեն ազգային գործողությունների ծրագիր մարդու իրավունքները, այդ թվում նաև ԼԳԲՏ անձանց իրավունքները պաշտպանելու համար:

 Հանձնաժողովը քննարկել է «ԼԳԲՏ անձանց պաշտպանությունը խտրականության և օրեցօր աճող ատելության խոսքի համատեքստում. տեղական և տարածքային իշխանությունների դերակատարությունն ու պատասխանատվությունը» թեմայով զեկույցը: Փաստաթղթում ամրագրված է՝ ԵԽ-ն քննադատում է ԼԳԲՏ անձանց նկատմամբ օրեցօր աճող խտրականությունը:

Զեկույցը պատրաստվել է Լեհաստան կատարված փաստահավաք առաքելությունից հետո: Զեկույցում կոչ է արվում Լեհաստանի տեղական իշխանություններին մշակել քաղաքականություններ պաշտպանելու խոցելի խմբերի իրավունքները: