Օգոստոսի 27-ին ՀՀ Կենտրոնական ընտրական հանձնաժողովի նիստում որոշում կայացվեց Երևանի ավագանու արտահերթ ընտրությունները դիտարկելու համար հրավիրել Եվրոպայի տեղական և տարածքային իշխանությունների կոնգրեսի պատվիրակությանը:

ԿԸՀ նախագահ Տիգրան Մուկուչյանը նիստի ընթացքում հայտարարեց. «Սեպտեմբերի 23-ին նշանակված են Երևանի ավագանու արտահերթ ընտրություններ, ու ԿԸՀ-ն ունի իրավասություն միջազգային դիտորդներ հրավիրելու: Միաժամանակ ԿԸՀ-ին էր դիմել նաև Տարածքային կառավարման և զարգացման նախարարը՝ նշելով, որ տեղական ինքնակառավարման մարմինների ընտրության ընթացքում Եվրոպայի տեղական և տարածքային իշխանությունների կոնգրեսի կողմից դիտորդական առաքելություն իրականացնելու համար վերջինս հրավեր ուղարկելու միջնորդությամբ դիմել է վարչապետին: ԿԸՀ-ն պատրաստել է համապատասխան որոշման նախագիծ, որով առաջարկվում է Երևանի ավագանու արտահերթ ընտրություններին հրավիրել Եվրոպայի տեղական և տարածքային իշխանությունների կոնգրեսին»:

Հիշեցնենք՝ օգոստոսի 20-ին Հայաստանի համայնքների միության նախագահ, Եվրոպայի Խորհրդի (ԵԽ) տեղական և տարածքային իշխանությունների Կոնգրեսում ՀՀ պատվիրակության ղեկավար Էմին Երիցյանը ՀՀ վարչապետ Նիկոլ Փաշինյանին գրավոր միջնորդություն էր ներկայացրել ՀՀ օրենսդրության սահմանած կարգով ԵԽ Կոնգրեսին հրավիրել իրականացնելու սեպտեմբերի 23-ին կայանալիք Երևանի ավագանու արտահերթ ընտրությունների ընթացքի դիտորդական առաքելություն: