Մարտի 14-ին Հայաստանի համայնքների միությունում հյուրընկալվեց Ռեգիոնների եվրոպական ակադեմիայի պատվավոր անդամ, Եվրոպական տնտեսական և սոցիալական հանձնաժողովի նախկին նախագահ, հանձնաժողովի անդամ  Հենրի Մալոսը:

Հայաստանի համայնքների միության նախագահ Էմին Երիցյանը ներկայացրեց Հայաստանի համայնքների միության գործունեության ուղղությունները, նպատակները, միջազգային համագործակցությունն ու Հայաստանում իրականացվող աշխատանքները: Մանրամասն ներկայացվեց, թե ինչպիսի համագործակցություն ունի Հայաստանի համայնքների միությունը Եվրոպայի խորհրդի, Եվրոպական միության հետ և Արևելյան գործընկերության շրջանակում: Էմին Երիցյանը շեշտեց՝ Միության հիմնական ուղղություններից է ընտրված և նշանակովի պաշտոնյաների վերապատրաստումները: Այս առիթով մանրամասնեց. «Հայաստանի համայքների միությունը 10-ից ավելի տարիներ իրականացնում է տարեկան 1000-ից ավելի համայնքային ծառայողների, համայնքների PR պատասխանատուների, լրագրողների, ավագանիների և նորընտիր համայնքի ղեկավարների վերապատրաստումներ»:

Էմին Երիցյանի փաստմամբ՝ Միության գործունեության մյուս ուղղությունը արտաքին կապերն են. «ԵԽ Կոնգրեսում, CORLEAP-ում մենք ունենք պատվիրակություն: Մենք համակարգում ենք նաև մեր համայնքների արտաքին կապերը: Ամենակարևորներից է Ֆրանկոֆոնիան, ֆրանսիական համագործակցությունը: Այս ծրագրերի գծով ունենք մեծ համագործակցություն»:

Հենրի Մալոսն ի պատասխան նշեց.  « Մեծապես տպավորված եմ Հայաստանի համայնքների միության՝ ծրագրերի իրականացման բնագավառում ակտիվությամբ և Միության կողմից կարողությունների զարգացմամբ: Մասնավորապես տպավորիչ են աշխատակազմերի, ընտրված անդամների վերապատրաստումները, էներգախնայողության ծրագրերը, տնտեսական զարգացման, քաղաքացիների հետ երկխոսության ապահովմանն ուղղված ծրագրերը»:

Հանդիպման ավատին Հենրի Մալոսը կարծիք հայտնեց, որ տեսնում է լավ հեռանկար Ռեգիոնների եվրոպական ակադեմիայի և Հայաստանի համայնքների միության միջև համագործակցության առումով հատկապես համայնքների անկախության և կարողությունների զարգացման ոլորտում: