Հայաստանի համայնքների միությունը շարունակում է ներկայացնել, թե արտակարգ դրության օրերին ինչպես է ընթանում կյանքը Հայաստանի համայնքներում: «Համայնքներն արտակարգ դրության ժամանակ» խորագրով նոր նախաձեռնության շրջանակներում ներկայացնում ենք տեղեկություններ ՀՀ համայնքներում տիրող իրավիճակի և համայնքներում անցկացվող կանխարգելիչ միջոցառումների մասին: Ներկայացնում ենք, թե ինչ կանխարգելիչ ախտահանման աշխատանքներ են իրականացվում ՀՀ Արագածոտնի մարզի Փարպի համայնքում:

Զրուցեցինք Փարպի համայնքի ղեկավար Իշխան Առաքելյանի հետ:

-Արտակարգ դրության օրերին ինչպե՞ս է ընթանում համայնքային կյանքը:

-Համայնքի բնակիչներն այս օրերին տնից դուրս չեն գալիս: Համայնքի փողոցներում մարդիկ չեք տեսնի: Համայնքում ունենք կորոնավիրուսով վարակված բնակիչ: Վարակը բացահայտվել է մարտի 30-ին: Նրա շփման շրջանակը ճշտվում է, այդ անձի ընտանիքը տեղափոխվել է Ծաղկաձոր: Այն մարդիկ, որոնք շփվել են վարակակրի հետ, ինքնամեկուսացված են: Ամեն օր զանգում, հարցնում ենք՝ ջերմություն ունե՞ն, թե՝ ոչ:

-Համայնքի բնակիչներն ինչպե՞ս են պահպանում ինքնամեկուսացման կանոնները:

-Գյուղի փողոցներում գրեթե մարդ չկա, խանութները փակ են, առևտուրը կատարվում է օնլայն: Կամ եթե բնակիչները ցանկանում են խանութից որևէ բան գնել, զանգում, ասում են՝ այդ ապրանքները պետք են, խանութի դիմաց՝ դրսում դնում են, որ նա գնա, վերցնի: Այդպես ենք անում, որ շփումները նվազեցնենք, որ քիչ վարակակիրներ ունենանք:

-Համայնքում ախտահանման, վարակազերծման ի՞նչ աշխատանքներ են կատարվում և ի՞նչ գրաֆիկով:

-Ախտահանյան աշխատանքները հիմնականում կատարվում են ամենօրյա գրաֆիկով: Համայնքում իրականացվում են քլորաջրով ախտահանման աշխատանքներ: Ախտահանում ենք գյուղամեջը, գյուղի փողոցները: Համայնքապետարանն օրական երեք անգամ ախտահանում ենք ախտահանիչ նյութերով: Անհրաժեշտ կանխարգելիչ միջոցառումներ իրականացնում ենք: Ամբուլատորիային օգնում ենք գույքով, նյութերով:

-Ինչպե՞ս է համայնքապետարանը կազմակերպում աշխատանքները:

-Համայնքապետարանի՝ 60 տարեկանից բարձր աշխատակիցներն աշխատում են տնից՝ հեռավար եղանակով: Միայն անհրաժեշտության դեպքում ենք աշխատակիցներին հրավիրում համանքապետերան: Աշխատում ենք  հերթապահությամբ՝ տնից, հեռախոսային կապով: Ոչ մի բնակչի չենք ընդունում համայնքապետարանում. բոլոր հարցերը կարգավորվում են հեռախոսով:

-Այս պահին համայնքն ի՞նչ օգնության կարիք ունի:

-Հիմնականում ախտահանիչ նյութերի պահանջ ունենք:

-Համայնք մուտքն ու ելքը վերահսկվո՞ւմ է:

-Խստացված հսկողություն է սահմանված: Այն բնակիչները, որոնք գնում են աշխատանքի՝ միայն տեղեկանքով: Պարետի տված ցուցումները կատարվում են:

-Ձեր գնահատմամբ՝ այսպիսի արտակարգ իրավիճակներում մեր համայնքները որքանո՞վ են պատրաստ աշխատել:

-Իհարկե, սա առաջին նմանատիպ իրավիճակն է, բայց գյուղապետերը, քաղաքապետերը փորձ ունեն, որն էլ օգտագործվում է: Մենք հիմա ավելի մեծ փորձ ձեռք կբերենք, կիմանանք՝ ինչպես աշխատել: Դժվարությունը մարդկանց համոզելն է, որ պետք է պահպանել ինքնամեկուսացման կանոնները: Մեր ազգը դրսում է օրենքի պահապան, այստեղ երբեմն չեն լսում: