Փետրվարի 27-ին Հայաստանի համայնքների միությունում հյուրընկալվել է ՀՀ-ում Ֆրանսիայի դեսպանատան ապակենտրոնացված համագործակցության և քաղաքացիական հասարակության գծով կցորդ Մարի Լորժոն։

Մարի Լորժոյի այցի նպատակն է տեղեկություններ ստանալ հայ-ֆրանսիական ապակենտրոնացված համագործակցության հարցերի շուրջ, ծանոթանալ իրավիճակին, քննարկել հայ և ֆրանսիական համայնքների միջև ապակենտրոնացված նոր համագործակցություններին առնչվող հարցեր։

Հայաստանի համայնքների միության նախագահ Էմին Երիցյանը Մարի Լորժոյի հետ հանդիպմանը ներկայացրել է ՏԻՄ ոլորտում վերջին շրջանում տեղի ունեցած փոփոխությունները։ Էմին Երիցյանն ընդգծել է՝ ՀՀ համայնքների կողմից ֆրանսիական գործընկերների հետ համագործակցության հարցում մեծ հետաքրքրվածություն կա։ Համայնքների միավորման գործընթացի արդյունքում ավելի խոշոր համայնքների ձևավորումը կնպաստի հայ-ֆրանսիական ապակենտրոնացված համագործակցության ավելի ամրացմանը։ Էմին Երիցյանը նաև կարևորել է հայ և ֆրանսիական համայնքների համագործակցությունը ֆոնդհայթայթման ոլորտում։ Նա կարևորել է նոր՝ խոշորացված համայնքների աշխատակազմերի կարողությունների զարգացումը, ինչին կնպաստեն փոխայցերը։

Փաստելով, որ հայ-ֆրանսիական ապակենտրոնացված համագործակցությունն այլ կշիռ ունի, այլ մակարդակի վրա է, Էմին Երիցյանը նաև կարևորել է այդ համագործակցության ընդլայնումը։

Մարի Լորժոն տեղեկացրել է, որ արդեն ՀՀ 6 համայնքներ ցանկություն են հայտնել ապակենտրոնացված համագործակցություններ սկսել ֆրանսիական գործընկերների հետ և Հայաստանի համայնքների միությանը խնդրել աջակցություն այս գործընթացի կազմակերպման հարցում։  

Կարևորվել է նաև hայ-ֆրանսիական ապակենտրոնացված համագործակցության շրջանակներում գործող Հայաստանի համայնքների միության «Ֆրանսիա» խմբի գործունեությունը, ինչը կարևոր հարթակ է այս համագործակցությունն առաջ մղելու համար։