ՀՀ Գեղարքունիքի մարզի Վարդենիս համայնքի ղեկավար Արամ Մելքոնյանի համոզմամբ՝ ճգնաժամային իրավիճակներում ավելի է մեծանում տեղական իշխանությունների դերակատարությունը:

Հայաստանի համայնքների միության «Համայնքներն արտակարգ դրության ժամանակ» նախաձեռնության շրջանակներում Արամ Մելքոնյանը ներկայացրեց, թե արտակարգ դրության օրերին ինչպես են օգնում համայնքի բնակիչներին, ինչ ծրագրեր են իրականացվում համայնքում:

Հետաքրքրվեցինք՝ ամենաշատն ի՞նչ խնդիրներով են դիմում համայնքապետարան, Արամ Մելքոնյանը պատասխանեց. «Բարեբախտաբար այս օրերին ոչ շատ են դիմում, քանի որ «ԳեոՊրոՄայնինգ Գոլդ» ընկերությունը, որ այստեղ աշխատում է, դրա շնորհիվ գործազուրկներ քիչ կան մեր համայնքում: Իսկ արտակարգ դրության պայմաններում թույլատրվում է բաց հանքեր շահագործելը: Մեզ հիմնականում դիմում են տարեցները, որոնք ապրուստի խնդիր ունեն: Մենք էլ փորձում ենք օգնել»:

Համայնքի ղեկավարն ասաց, որ տարբեր կազմակերպությունների կողմից օգնություն է հատկացվում ու մանրամասնեց. «ԳեոՊրոՄայնինգ Գոլդ» ընկերությունը 796 ընտանիքի օգնություն տրամադրեց, ՄԱԿ-ի զարգացման գրասենյակն օգնություն է տրամադրել, «Էկովիլ» ըկերությունը բավականին օգնություն տրամադրեց: Հիմնականում մենք ենք գտնում, թե ովքեր են ավելի խոցելի, ում ընտանիքում կա հիվանդ, անաշխատունակ, տարեց, միայնակ թոշակառու, ցուցակագրում ենք նրանց և մեր մեքենաներով օգնությունն ուղարկում նրանց տուն՝ կուտակումներից խուսափելու համար»:

Արամ Մելքոնյանի տեղեկացմամբ՝ այս օրերին համայնքում երկու-երեք օրը մեկ կատարվում են նաև ախտահանման աշխատանքներ: Ախտահանվում են փողոցները, մայթերը խանութների մուտքերը:

Արամ Մելքոնյանից հետաքրքրվեցինք՝ արտակարգ դրության օրերին ի՞նչ դասեր պետք է քաղենք, նոր հմտությունները, օրինակ հեռավար աշխատանքը, կլինի՞ շարունակական, համայնքի ղեկավարն ասաց. «Սովորություններ կան, որ ձեռք կբերենք, կպահպանենք հետագայում էլ: Առցանց տարբերակով աշխատանքի հետ կապված վերաբերմունքս ոչ միանշանակ է»:

Խոսելով լարված, ճգնաժամային իրավիճակներում համայնքային իշխանությունների դերակատարության մասին՝ Արամ Մելքոնյանը փաստեց. «Միանշանակ նման լարված իրավիճակներում համայնքային իշխանությունների դերակատարությունն ավելի է մեծանում: Այս օրերին էլ զգացինք և′ համակարգելու, և′ մարդկանց խնդիրներին արագ արձագանքելու առումով: Մեր տարածաշրջանը նպաստավոր է. գյուղմթերքների արտադրության հետ կապված փորձում ենք մարդկանց խրախուսել, որ զբաղվեն գյուղատնտեսությամբ: Ունենք տարբեր տեսակի սերմնացուներ, որ փորձում ենք տրամադրել մարդկանց, որ գյուղատնտեսությամբ զբաղվեն. և′ քաղաքում չեն լինի, և′ բաց դաշտում կաշխատեն, և′ եկամուտ կստանան»:

Արամ Մելքոնյանը նաև շնորհակալություն հայտնեց ազգաբնակչությանն այս արտակարգ իրավիճակը պահելու, պարետի ցուցումներին հետևելու, մեկուսանալու, այս ամենին  ըմբռնումով մոտենալու համար: