«ԵՄ կայուն էներգիայի շաբաթ 2020»-ի շրջանակներում Արթիկի համայնքապետարանի կողմից հունիսի 23-ին հայտարարված՝ «Ճգնաժամից դուրս մաքուր էներգիա կանաչ վերականգնման և աճի համար» խորագրով առցանց վիկտորինայի, նկարչական և լուսանկարչական մրցույթների բոլոր մասնակիցները հուլիսի 13-ին հանդիսավոր կերպով պարգևատրվեցին թեմատիկ յուրօրինակ նվերներով, շնորհակալագրերով և հավաստագրերով։

Առցանց վիկտորինայում առաջին տեղը զբաղեցրած Դավիթ Կակոյանը պարգևատրվեց ԵՀ ‹‹Քաղաքապետերի դաշնագիր՝ Արևելք›› (CoM East)-ի կողմից սահմանված մրցանակով և հավաստագրով: Նկարչական և լուսանկարչական մրցույթում հաղթող ճանաչված շնորհալի մասնակիցներին համայնքապետարանը պարգևատրեց խրախուսական թեմատիկ նվերներով և շնորհակալագրերով:

Հիշեցնենք, որ քաղաքապետերի դաշնագրին անդամակցող համայնքների, որի անդամ է նաև Արթիկը, կամավոր ստանձնած հանձնառություններից մեկն է բնակիչների և շահառուների իրազեկումը էներգաարդյունավետության, վերականգնվող էներգետիկ ռեսուրսների ու էներգաարդյունավետ տեխնոլոգիաների կիրառման, կանաչ զարգացման, և կլիմայի փոփոխության մեղմման ու հարմարվողականության մասին, որոնք իրականացվում են ԵՄ Կայուն էներգիայի շաբաթների ընթացքում: Այս տարի ԵՄ Կայուն էներգիայի շաբաթը կազմակերպվում է վիրտուալ ձևաչափով, ինչը հնարավորություն տվեց համայնքներին ավելի մեծ թվով մասնակիցներ ներգրավել միջոցառումներին: