Ապրիլի 25-ին «ԵՄ-ն հանուն Հայաստանի կայուն էներգիայի» (EU4ASEP) ծրագրի շրջանակներում տեղի է ունեցել  Համայնքային կայուն էներգետիկայի համաժողովը:

Միջոցառմանը մասնակցել են Տարածքային կառավարման և ենթակառուցվածքների նախարար Գնել Սանոսյանը, Հայաստանում ԵՄ պատվիրակության ղեկավար Անդրեա Վիկտորինը, Հայաստանի համայնքների միության նախագահ Էմին Երիցյանը, ՀՀ համայնքների, մասնավոր ընկերությունների, դոնոր կազմակերպությունների ներկայացուցիչներ և այլք:

Տարածքային կառավարման և ենթակառուցվածքների նախարար Գնել Սանոսյանը, ողջունելով համաժողովի մասնակիցներին նշել է. «Հայաստանի էներգետիկայի զարգացման ոլորտային ռազմավարության առումով կարևոր դեր է տրված արևային էներգիայի զարգացմանը, և ուրախ եմ արձանագրել, որ մեր համայնքներն այս ոլորտի մի մասն են կազմում»:

Հայաստանում ԵՄ պատվիրակության ղեկավար Անդրեա Վիկտորինը վստահեցրել է՝ Եվրոպական միությունն աջակցում է Հայաստանի համայնքներում կայուն էներգիան խթանող ծրագրերի իրականացմանը։ «Կարևոր է միասին աշխատել էներգետիկ անվտանգության և էներգախնայողության ուղղությամբ: Կայուն էներգետիկայի ոլորտում ներդրումները լավ հնարավորությwւն են համայնքների էներգետիկ անկախության բարձրացման առումով»:

Դեսպան Վիկտորինը նկատել է՝ այս առումով EU4ASEP ծրագիրը կիրառել է նորարարական բիզնես մեխանիզմներ՝ համայնքներում կանաչ էներգիա արտադրելու, կայուն դրամական հոսքեր ստեղծելու համար: Դեսպանը նաև նշել է, որ էներգախնայողության և կայուն էներգետիկ զարգացման հարցում մեծ դերակատարություն ունի Քաղաքապետերի դաշնագիր նախաձեռնությունը:

Հայաստանի համայնքների միության նախագահ Էմին Երիցյանը նշել է, որ ծրագիրը նոր հնարավորություններ է բացել ոլորտի համար, և հատկապես կարևոր է համայնքների դերակատարությունը. «Արագ փոփոխվող մեր իրականության մեջ այս ծրագրերը կարծում եմ, տեղական իշխանությունների համար պետք է հավելյալ հնարավորություն ծառայեն նշված ուղղությունների զարգացման առումով»:

Էներգախնայողության աջակցման հիմնադրամի տնօրեն, «ԵՄ-ն հանուն Հայաստանի կայուն էներգիայի» ծրագրի ղեկավար Աստղինե Պասոյանը ներկայացրել է EU4ASEP ծրագրի ձեռքբերումները. «EU4ASEP ծրագիրը նաև իրականացրել է մի շարք նախագծեր՝ ապահովելով թիրախային համայնքների, քաղաքապետարանների աշխատակազմի մասնագիտական կարողությունների զարգացման և բնակչության իրազեկվածության մակարդակի բարձրացման համար»: