Եվրոպական միության ռեգիոնների կոմիտեն շարունակում է քննարկումներն այն ուղղությամբ, թե ինչ քայլեր են ձեռնարկվում Եվրոպայի տարածքում տեղական և տարածքային իշխանությունների փորձը միավորելու հարցում, որը կօգնի հաղթահարել ստեղծված արտակարգ իրավիճակը:

Եվրոպական միության Ռեգիոնների կոմիտեի նախագահ Ապոստոլոս Ցիցիկոստասը Եվրոպական երկրների նախարարների հետ պարբերաբար քննարկում է այս հարցերը: Ավստրիայի աշխատանքի, սոցիալական հարցերի և միջազգային հարաբերությունների նախարար Մարտին Էյչթինգերի հետ տեսակապով զրույցում նա հայտարարեց, որ հրատապ է Եվրոպական միության հաջորդ բյուջեի պլանավորման հարցում հատկապես ուշադրւթյուն դարձնելը քաղաքներին և ռեգիոններին օգնության հարցին: ԵՄ Ռեգիոնների կոմիտեի նախագահը հայտարարեց. «Համախմբման քաղաքականությունը և այն եզակի գործընկերությունը, որն առկա է Եվրոպական միության և գործընկեր երկրների կառավարությունների ու տեղական իշխանություների միջև, այն բանալին են, որը դռներ է բացում դեպի համավարակի հաղթահարում և եվրոպական տնտեսության վերականգնում: Ըստ նրա՝ բոլոր տարաձայնություններն ու բաժանումները պետք է այս ժամանահատվածում հաղթահարվեն, որպեսզի հնարավոր լինի իրագործել առողջացման ծրագիրը՝ հիմնված ԵՄ-ի բյուջեի վրա: Հակառակ դեպքում մեծ է վտանգը, որ ի վիճակի չենք լինի պաշտպանել մեր քաղաքացիների անվտանգությունը, ապահովել նրանց առողջապահական և սոցիալական իրավունքները, շարունակել Եվրոպայի այն քաղաքականությունը, որն ուղղված է օգնել բիզնեսին գոյատևել և ներդրումներ կատարել կայուն ապագայի համար»:

«Եվրոպական միության ռեգիոնների կոմիտեն Եվրոպայի ռեգիոնների միասնական ձայնն է և համապատասխանաբար դրսևորում է համախմբվածություն և համերաշխություն»,- հայտարարեց Ավստրիայի աշխատանքի, սոցիալական հարցերի և միջազգային հարաբերությունների նախարարը: