Հայաստանի համայնքների միությունը  շարունակում է ներկայացնել, թե արտակարգ դրության օրերին ինչպես է նթանում կյանքը Հայաստանի համայնքներում: «Համայնքներն արտակարգ դրության ժամանակ» խորագրով նոր նախաձեռնության շրջանակներում ներկայացնում ենք տեղեկություններ ՀՀ համայնքներում տիրող իրավիճակի և համայնքներում անցկացվող կանխարգելիչ միջոցառումների մասին: Ներկայացնում ենք, թե ինչ կանխարգելիչ ախտահանման աշխատանքներ են իրականացվում Գյումրի քաղաքում:

Մեր հարցերին պատասխանեց Գյումրու քաղաքապետ Սամվել Բալասանյանը:

-Այս օրերին ինչպե՞ս է ընթանում համայնքային կյանքը Գյումրի քաղաքում:

-Արտակարգ դրության առաջին իսկ օրերից համայնքապետարանում աշխատանքը կազմակերպվել է մեկ պատուհանի սկզբունքով։  Դիմումները, գրությունները էլեկտրոնային փոստի միջոցով  ուղարկելու մասին տրվել են հայտարարություններ, բնակչությանը տեղեկացվել է, թե ինչ սկզբունքով և որ հասցեին դրանք պետք է ուղարկվեն։

-Համայնքում ի՞նչ միջոցառումներ են իրականացվում կորոնավիրուսի կանխարգելման համար: Արդյոք գլխավոր փողոցներից բացի ախտահանվո՞ւմ են նաև երկրորդական և երրորդական փողոցները:

-Համայնքապետարանն այս օրերին իրականացրել և շարունակում է իրականացնել վարակի տարածումը կանխարգելող բոլոր այն գործառույթները, որ տրվում է պարետի ցուցումով։ Ամենօրյա ռեժիմով ախտահանման աշխատանքներ են իրականացվում քաղաքի փողոցներում, արտահանվում են աղբամանները, կանգառները, հասարակական տրանսպորտը։ Ախտահանման աշխատանքներ իրականացվում են քաղաքի բոլոր հատվածներում, գլխավոր և երկրորդական փողոցներում։ Շիրակի մարզում ձևավորվել է կանխարգելման աշխատանքների համակարգման շտաբ, որը ղեկավարում է Շիրակի մարզպետը:

-Ի՞նչ ռեժիմով է աշխատում Գյումրու քաղաքապետարանն արտակարգ դրության պայմաններում:

-Քաղաքապետարանն աշխատում է ոչ ամբողջ կազմով, ռիսկային  խմբերի, 60-ից բարձր տարիքային խմբի աշխատակիցներն աշխատում են տնից: Իսկ այն բաժինները, որոնց աշխատանքը հնարավոր չէ լիովին համակարգել տնից, այդ բաժինների աշխատակիցները հիմնականում աշխատում են տնից, իսկ աշխատանքները համակարգում է բաժնի ղեկավարը: Համայնքապետարանն անցել է աշխատանքի առցանց և մեկ պատուհան սկզբունքի: Մուտքը քաղաքապետարան սահմանափակվել է:Դիմումները, գրությունները էլեկտրոնային փոստի միջոցով  ուղարկելու մասին տրվել են հայտարարություններ:

-Ձեր գնահատմամբ՝ համայնքներն այսօր պատրա՞ստ են դիմակայելու կորոնավիրուսին:

-Համայնքներն իրենց ունեցած հնարավորությունների շրջանակներում անում են ամեն հնարավորը։