Եվրոպայի խորհրդի տեղական և տարածքային իշխանությունների կոնգրեսի (ԵԽ Կոնգրես) նախագահ Անդերս Կնապեն իր մտահոգությունն է հայտնել համայնքների ընտրված ղեկավարների լիազորությունների շարունակական դադարեցման առիթով: 

Նա մասնավորապես իր մտահոգությունը հայտնել է Թուրքիայում տեղի ունեցող զարգացումների առնչությամբ՝ ահազանգելով երկրում տեղական ինքնակառավարման ոլորտի  շարունակական քայքայման մասին:

Նա մասնավորապես հայտարարել է. «Անգամ COVID-19 համավարակի  պայմաններում, որը բավականին լուրջ հարված է հասցրել Թուրքիային, մենք շարունակում ենք զեկույցներ ստանալ երկրում ընտրված համայնքապետերի լիազորոթյունների շարունակական դադարեցումների և նշանակված անձանց պաշտոնավարման մասին՝   մասնավորապես Թուրքիայի հարավ-արևելքում:  Որպես հետևանք՝  բավականին մեծ թվով այժմ համայնքներ ղեկավարվում են ոչ թե 2019-ի մարտի 31-ին ընտրված անձանց կողմից, այլ կենտրոնական իշխանության կողմից նշանակված անձանց կողմից: Ինչպես նախկինում եմ այս իրավիճակների մասին ասել, դատական տարբեր գործընթացներ պետական իշխանության կողմից օգտագործվում են տեղական ընտրված ներկայացուցիչների դեմ: Ընտրված պաշտոնյաներին նշանակված ներկայացուցիչներով փոխարինումը ոչ միայն ընտրված պաշտոնյաների դեմ ուղղված գործընթաց է, այլև լուրջ մարտահրավեր երկրում տեղական ժողովրդավարության հաստատման հարցում»: