Ապրիլի 3-ին Եվրոպայի խորհրդի տեղական և տարածքային իշխանությունների կոնգրեսը 36-րդ նստաշրջանի լիագումար նիստի ընթացքում քննարկեց այն հարցը, որ նյութական մտահոգությունները չպետք է պատճառ դառնան, որ համայնքի բնակիչները չկանգնեն տեղական ընտրված ինստիտուտների կողքին:

Հիշեցնենք՝ ապրիլի 2-ին Ստրասբուրգում մեկնարկեց Եվրոպայի խորհրդի Տեղական և տարածքային իշխանությունների կոնգրեսի 36-րդ նստաշրջանը: Կոնգրեսի աշխատանքներին մասնակցում է հայկական պատվիրակությունը՝ Հայաստանի համայնքների միության նախագահ Էմին Երիցյանի գլխավորությամբ: Նստաշրջանն անցկացվում է «Քաղաքապետերը՝ ժողովրդավարության երաշխավոր» խորագրով:

Մասնավորապես Կոնգրեսի անդամները հղում կատարեցին Տեղական ինքնակառավարման եվրոպական խարտիայի 7-րդ հոդվածին՝ համաձայն որի՝ քաղաքացիների իրավունքն ու կարողությունը պաշտպանել ընտրված ինստիտուտը տեղական ժողովրդավարության հիմնարար սկզբունքներից է:

Այս թեմայով զեկույց ներկայացրին Կոնգրեսի համազեկուցող Մարթա Քամփանարի-Թալաբերը (Հունգարիա) և Ռոբերտ Գրումանը (Ռումինա): Զեկույցում ամրագրված է, որ թեև բոլոր անդամ երկրներն այժմ ունեն ֆինանսական փոխհատուցման ձև ընտրված տեղական ներկայացուցիչների համար, բայց 13 անդամ երկրները դեռ չեն վավերացրել այս հարցերը կարգավորող հոդվածը:

Կոնգրեսը հորդորում է անդամ պետություններին վավերացնել Խարտիայի Հոդված 7.2-ը և ընդունել աշխատավարձի սանդղակներ՝ նշելով նվազագույն  և առավելագույն մակարդակները տեղական իշխանության ղեկավարների համար: Կոնգրեսի անդամները շեշտում են, որ այս ծախսերը պետք է լինեն թափանցիկ և բաց հանրության համար:

Կոնգրեսը նաև անդամ երկրների տեղական և տարածքային իշխանություններին հորդորում է ապացուցել, որ ֆինանսական փոխհատուցման այս ձևերը համաչափ են տեղական իշխանությունների ներկայացուցիչների կարիքների և պատասխանատվության հետ:

Կոնգրեսը տեղական իշխանությունների ընտրված ներկայացուցիչներին կոչ է անում կանոնավոր կերպով գնահատել իրենց ֆինանսական փոխհատուցման համապատասխանությունն՝ առաջարկելով համապատասխան փոփոխություններ`հաշվի առնելով տեղական իշխանության ներկայացուցիչների առաջադրանքներն ու պարտականությունները: