Շարունակվում են մարզային երիտասարդության համար կազմակերպվող վեբինարները՝ «Վ4-ը հանուն ՏԻՄ-երում երիտասարդների ներգրավման» ծրագրի շրջանակներում: Մայիսի 16-ին կազմակերպվեց առցանց աշխատաժողով՝ վեբինար Արագածոտնի մարզի երիտասարդների համար:

«Ազատ քաղաքացի» քաղաքացիական նախաձեռնությունների աջակցման կենտրոնը՝ Հայաստանի համայնքների միության հետ համագործակցաբար Վիշեգրադի միջազգային հիմնադրամի (Սլովակիա) աջակցությամբ իրականացնում է «Վ4-ը հանուն ՏԻՄ-երում երիտասարդների ներգրավման» ծրագիրը: Ծրագրի նպատակն է զարգացնել երիտասարդ քաղաքացիական ակտիվիստների կարողությունները ՏԻՄ-երի գործունեության մեջ ներգրավման, դրանց մշտադիտարկման եւ վերահսկողության գործում, բարձրացնել նրանց իրազեկվածությունը Եվրոպական կառույցների, ինստիտուտների եւ Հայաստանում իրագործվող դրանց ծրագրերի վերաբերյալ, այդ թվում՝ Եվրամիության, Եվրոպայի խորհրդի, Արեւելյան գործընկերության, Վիշեգրադ-4 ձեւաչափի:

Ծրագրին մասնակցեցին մարզ 16-30 տարեկան տասնյակ երիտասարդներ: Նշենք, որ այսպիսի վերբինարներ կազմակերպվել են նաև Վայոց ձորի, Կոտայքի և այլ մարզերի երիտասարդների համար:

Արագածոտնի մարզի երիտասարդների համար կազմակերպված վեբինարի  ընթացքում անցկացվեց նաև հեռավար հանդիպում Աշտարակ համայնքի ղեկավարի տեղակալ Գևորգ Եղիազարյանի հետ։

Երիտասարդները համայնքի ղեկավարի տեղակալից հետաքրքրվեցին տեղական ինքնակառավարման, համայնքային կառավարման և ՏԻՄ գործունեության հետ կապված տարաբնույթ հարցերի մասին: Գևորգ Եղիազարյանը ներկայացրեց համայնքապետարանի գործունեությունը, ՏԻՄ համակարգին առնչվող նրբություններ, պատասխանեց երիտասարդների հարցերին:

Քննարկման ընթացքում անդրադարձ կատարվեց երիտասարդների կարողությունների զարգացման եւ իրազեկվածության բարձրացման անհրաժեշտությանը, ՏԻՄ-ի նկատմամբ հետաքրքրվածությանը:

Ծրագրի շրջանակներում «Ազատ քաղաքացի» քաղաքացիական նախաձեռնությունների աջակցման կենտրոնի գործընկերներն են ԳԼՈԲՍԵԿ (GLOBSEC – Գլոբալ անվտանգություն, Սլովակիա), ՍԱԼՏՈ Երիտասարդության Արեւելյան Եվրոպայի եւ Կովկասի ռեսուրսներ (SALTO, Լեհաստան), ԱԳՈՐԱ (AGORA, Չեխիայի Հանրապետություն), Բուդապեշտի Քաղաքականությունների վերլուծության ինստիտուտ (BIPA, Հունգարիա), Հայաստանի համայնքների միություն: