Հայաստանի համայնքների միության նախաձեռնությամբ մայիսի 29-ին անցկացվեց «ՏԻՄ-երի ընտրական համակարգի փոփոխություններ» թեմայով վեբինար:

ՀՀ ԱԺ-ն քննարկում է տեղական ինքնակառավարման մարմինների համամասնական ընտրակարգի անցնելու օրենսդրական փոփոխությունների փաթեթը: ՀՀ ԱԺ-ն առաջին ընթերցմամբ արդեն ընդունել է ՀՀ ընտրական օրենսգրքում, «Կուսակցությունների մասին» սահմանադրական օրենքում, «Տեղական ինքնակառավարման մասին» օրենքում, «Երևան քաղաքում տեղական ինքնակառավարման մասին» օրենքում փոփոխություններ և լրացումներ կատարելու մասին օրենսդրական նախագծերի փաթեթը։

Վեբ-սեմինարի նպատակն է ոչ թե գնահատական տալն առաջարկվող փոփոխությունների վերաբերյալ, այլ դրանց մասին հանրային իրազեկվածություն ապահովելը:

Առաջարկվող փոփոխությունները կարևոր են և ունեն էական նշանակություն, քանի որ տեղական ինքնակառավարման 25 տարվա ինստիտուցիոնալ փորձը փոխվում է մեկ այլ ինստիտուցիոնալ համակարգի: Այս ճանապարհին առաջանում են տարբեր հարցեր՝ առաջարկվող փոփոխությունները ի՞նչ հետագա խնդիրների կարող են հանգեցնել, որո՞նք են ռիսկերը, ճի՞շտ է արդյոք ՀՀ-ի համար հրաժարվելը համայնքի ղեկավարի ուղիղ ընտրական համակարգից և այլն:

Օրենսդրական փոփոխությունների փաթեթում մեծ ներդրում ունեցած փորձագետ, իրավաբանական գիտությունների թեկնածու Վահագն Պետրոսյանը ներկայացրեց նախագծերի բովանդակությունը։ Փորձագետը նաև ներկայացրեց գործող, ընթացիկ իրավիճակը, իրազեկեց առաջակվող փոփոխությունների մասին, առաջարկվող փոփոխությունները ներկայացրեց սահմանադրական կարգավորումների համատեքստում:

Փորձագետի ներկայացումից հետո քննարկման մասնակիցները՝  համայնքների, ավագանու,  հասարակական կազմակերպությունների ներկայացուցիչների, համայնքային ծառայողներ հնչեցրին իրենց հետաքրքրող հարցերը ւ ստացան փորձագետի կողմից պատասխաններ: