Մայիսի 26-ին հեռավար կարգով անցկացվել է Եվրոպայի խորհրդի Տեղական և տարածքային իշխանությունների կոնգրեսի (ԵԽ Կոնգրես) Բյուրոյի նիստը: 

Նիստին մասնակցել է Հայաստանի համայնքների միության նախագահ, Եվրոպայի խորհրդի Տեղական ու տարածքային իշխանությունների կոնգրեսում Հայաստանի պատվիրակության ղեկավար Էմին Երիցյանը: Բյուրոյի անդամները մտքեր են փոխանակել Եվրոպայի խորհրդի Նախարարների կոմիտեի ժողովրդավարության հարցերով զեկուցող խմբի ղեկավար, Եվրոպայի խորհրդում Շվեդիայի մշտական ներկայացուցիչ դեսպան Մարտեն Էհնբերգի հետ:

Նիստի ընթացքում նշանակվել են Բյուրոյի նոր զեկուցողներ և ներկայացուցիչներ արտաքին մարմիններում:

ԵԽ Բյուրոյի անդամները մտահոգություն են հայտնել Թուրքիայում ազատազրկված Կոնգրեսի նախկին անդամների իրավիճակի կապակցությամբ:

Բյուրոն քննարկել է նաև ԵԽ Կոնգրեսի Մոնիտորինգի, Կառավարման և Ընթացիկ հարցերի հանձնաժողովների՝ 2021-2022 թվականների աշխատանքային ծրագրերը և Կոնգրեսի առաջնահերթությունների լույսի ներքո ընդունել է առաջիկայում պատրաստվելիք զեկույցների համար նոր չափանիշներ:

Բյուրոն նաև ընդունել է ԵԽ Կոնգրեսի 40-րդ նստաշրջանի երկրորդ մասի՝ հունիսի 15-17-ը հեռավար կարգով անցկացվելիք Կոնգրեսի նստաշրջանի օրակարգը: