2024 թվականի հունիսի 11-ից մինչև 13-ը նշվող ԵՄ Կայուն էներգիայի շաբաթվա (EU Sustainable Energy Week) շրջանակներում, ԵՀ «Քաղաքապետերի դաշնագիր՝ Արևելք» ծրագիրը՝ Հայաստանի համայնքների միության հետ համատեղ, հայտարարում է «Կայուն էներգիայի օրերի լավագույն կազմակերպիչ» մրցույթ համայնքային աշխատողների համար:

Մրցույթին կարող են մասնակցել ԵՄ «Քաղաքապետերի դաշնագիր» նախաձեռնությանն անդամակցող համայնքապետարանների այն ներկայացուցիչները, որոնք ներգրավված են ԵՄ Կայուն էներգիայի շաբաթվա ներքո համայնքներում միջոցառումների և մրցույթների կազմակերպման գործընթացներում, ներառյալ հասարակայնության հետ կապերի մասնագետները, Դաշնագրի հետ առնչվող գործընթացների համակարգողները, էներգետիկ կառավարիչները և այլն: Յուրաքանչյուր համայնքապետարանից մրցույթին կարող է մասնակցել մեկ ներկայացուցիչ:

Լավագույն կազմակերպիչները կորոշվեն Կայուն էներգետիկ շաբաթվա շրջանակում համայնքի բնակչության և շահառուների իրազեկման և երիտասարդության ներգրավմանն ուղղված միջոցառումների՝ հաջողությամբ կազմակերպման և ակտիվ լուսաբանման համար՝ հաշվի առնելով կազմակերպվող միջոցառումների և մրցույթների բազմազանությունը,  ինֆորմատիվությունը և նորարարությունը:

Մրցույթի շրջանակում պետք է ներկայացնել հետևյալ տեղեկատվությունը.

• Համայնքապետարանի կողմից կազմակերպվող միջոցառումների (Կայուն էներգիայի օրերի) ցանկը / օրակարգը:
• Կայուն էներգիայի օրերի շրջանակներում կազմակերպված բոլոր միջոցառումներն ու մրցույթներն արտացոլող ֆոտո/վիդեո նյութերը:
• Կայքերում, սոցիալական ցանցերում, ԶԼՄ-ներում և այլ հարթակներում համայնքում կազմակերպված միջոցառումները և մրցույթները լուսաբանող նյութերի հղումները, որոնք կարող են նաև տարածվել ԵՀ «Քաղաքապետերի դաշնագիր՝ Արևելք» ծրագրի և գործընկերների կայքէջերում և սոցիալական ցանցերում:
• Վերոհիշյալ նյութերը անհրաժեշտ է ուղարկել [email protected] կամ [email protected] էլեկտրոնային հասցեներին մինչև ս.թ. հունիսի 14-ը՝ նշելով միջոցառման կամ մրցույթի մասին կարճ տեղեկատվություն՝ անունը և տևողությունը, թիրախային խումբը, մասնակիցների թիվը, հաղթողներին, մրցանակաբաշխությունը և այլն:

Ներկայացված նյութերի գնահատումը կիրականացվի Ծրագրի կողմից՝ մինչև հունիսի 25-ը:

Հինգ լավագույն կազմակերպիչներին կշնորհվեն մրցանակներ, որոնք կտրամադրվեն ծրագրի կողմից Երևանում (միջոցառման վայրի և ժամի մասին մասնակիցները լրացուցիչ կտեղեկացվեն) կազմակերպվելիք մրցանակաբաշխության արարողության ընթացքում:

Մրցույթի մասին բոլոր հարցերով կարող եք գրել հետևյալ էլ. հասցեներով՝ [email protected] կամ [email protected]։

Հայաստանի համայնքների միություն