Հայաստանի համայնքների միության պատվիրակությունը մայիսի 24-27-ը Կազան քաղաքում մասնակցեց «Եվրասիայի քաղաքները և համաշխարհային միտումները» թեմայով դասընթացին։ Դասընթացը կազմակերպվել է «Միացյալ քաղաքներ և տեղական իշխանություններ» համաշխարհային կազմակերպության Եվրասիական տարածաշրջանային կառույցի (այսուհետ՝  UCLG-Եվրասիա) և Կազանի քաղաքապետարանի կողմից։

Պատվիրակության կազմում են Սպիտակ համայնքի ղեկավար Քաջայր Նիկողոսյանը, Դիլիջան համայնքի ղեկավար Դավիթ Սարգսյանը, Արթիկ համայնքի ղեկավար Անան Ոսկանյանը, Իջևան համայնքի ղեկավար Արթուր Ճաղարյանը, Նոյեմբերյան համայնքի ղեկավար Արսեն Աղաբաբյանը, Բյուրեղավան համայնքի ղեկավար Հակոբ Բալասյանը և Փարաքար համայնքի ղեկավարի տեղակալ Գոռ Սարիբեկյանը։

Դասընթացի ընթացքում Եվրասիայի տարածաշրջանի համայնքների ղեկավարները քննարկեցին միջազգային համագործակցությանը, քաղաքների կայուն զարգացմանը նվիրված և այլ հարցեր։

Օրակարգում ներառված է «Միջազգային համայնքային համագործակցությունը Եվրասիայի տարածաշրջանում և համաշխարհային միտումները» խորագիրը կրող լիագումար նիստ։ Գործնական հատվածում՝ թրեյնինգի ժամանակ համայնքի ղեկավարները անդրադարձան ժամանակակից պայմաններում Եվրասիական համայնքների՝ միջազգային հարաբերությունների զարգացման վերաբերյալ առաջարկություններին, միջազգային ասպարեզում քաղաքի իմիջի խթանմանը, Կայուն զարգացման նպատակների լավագույն գործելակերպին և այլն։