Փետրվարի 9-ին Ստրասբուրգում տեղի է ունեցել Եվրոպայի խորհրդի Տեղական և տարածքային իշխանությունների կոնգրեսի (ԵԽ Կոնգրես) Մոնիտորինգի հանձնաժողովի նիստը: Նիստին մասնակցել է ԵԽ Կոնգրեսում հայկական պատվիրակության ղեկավար Էմին Երիցյանը:

Մոնիտորինգի հանձնաժողովի նիստը բացել է հանձնաժողովի նախագահ Գուդրուն Մոսլեր-Թյորնշտրյոմը։ Նիստի մեկնարկին Կոնգրեսի անդամները մեկ րոպե լռությամբ հարգել են Թուրքիայում փետրվարի 6-7-ին տեղի ունեցած երկրաշարժի զոհերի հիշատակը։

Մոնիտորինգի հանձնաժողովի նիստի ընթացքում ԵԽ Կոնգրեսի Մոնիտորինգի հանձնաժողովի 5-րդ փոխնախագահ ընտրվեց Վլադիմիր Պրեբիլիչը (Սլովենիա)։

Հանձաժողովն ընդունեց Տեղական ինքնակառավարման եվրոպական խարտիայի կիրառումը Ռումինիայում զեկույցի նախագիծը։ Զեկուցողնեը ներկայացրել են այս երկրում տեղական ինքնակառավարման ոլորտում վերջին զարգացումները և վերլուծել են Խարտիայի կիրառումը։ Նաև ներկայացվել են Բոսնիայում և Հերցեգովինայում, Սլովենիայում 2022-ին կայացած ընտրությունների մասին զեկույցներ։

Հանձնաժողովի անդամները համաձայնել են ընդունել Բեռլինի շրջանային խորհուրդների կրկնակի ընտրությունների դիտարկման վերաբերյալ զեկույցի նախագիծը։

Հանձնաժողովի նիստի ընթացքում  Ուկրաինայի ազգային պատվիրակության ղեկավար Լիլիյա Պաշշինան ներկայացրել է պատերազմի ժամանակ Ուկրաինայի քաղաքներում և շրջաններում տիրող իրավիճակը։ Մոնիտորինգի հանձնաժողովն իր աջակցությունն ու համերաշխությունն է հայտնել Ուկրաինային: