Օգոստոսի 6-ին համայնքի ղեկավարներ, ավագանու անդամներ,  համայնքային ծառայողներ, ՀԿ-ների ներկայացուցիչներ և շահագրգիռ այլ անձինք քննարկեցին «Տեղական ինքնակառավարման եվրոպական խարտիայի դրույթները:

Հայաստանի համայնքների միությունն անցկացրեց «Տեղական ինքնակառավարման եվրոպական խարտիան և տեղական ժողովրդավարության վիճակը Հայաստանում» թեմայով վեբինար:

Վեբինարը վարեց Հայաստանի համայնքների միության նախագահ, Եվրոպայի խորհրդի տեղական ու տարածքային իշխանությունների կոնգրեսի փոխնախագահ Էմին Երիցյանը:

Վեբինարի սկզբում Էմին Երիցյանը ներկայացրեց Տեղական ինքնակառավարման եվրոպական խարտիայի դրույթները, Խարտիայի նպատակները: Ներկայացման ընթացքում անդրադարձ կատարվեց տեղական ինքնակառավարման իրավասության ոլորտին, տեղական ինքնակառավարման մարմինների գործունեության վարչական վերահսկողությանն առնչվող հարցերի:

Այս վեբինարն ավելի գործնական բնույթի էր, մասնակիցները քննարկեցին տարբեր հարցեր՝ կապված Խարտիայի դրույթների իրականացման, տեղական ժողովրդավարության և այլնի հետ: Մտահոգություններ հնչեցին նաև տեղական ինքնակառավարման մարմինների ոչ բավարար ֆինանսավորման, ռեսուրսների անարդար բաշխման առիթով:

Առցանց քննարկումը կազմակերպվեց Վիշեգրադի միջազգային հիմնադրամի աջակցությամբ իրականացվող «Համագործակցություն քաղաքների կայուն զարգացման ուղղությամբ. ընդհանուր մարտահրավերներ, ընդհանուր լուծումներ» ծրագրի շրջանակներում:

Վիշեգրադի միջազգային հիմնադրամի աջակցությամբ իրականացվող  ծրագրի նպատակն է աջակցել համայնքներին քաղաքական պաշտոնյաների և աշխատակազմերի կարողությունների զարգացման հարցում:

Ծրագրի գործընկերներն են Լեհաստանի քաղաքների ասոցիացիան, Սլովակիայի քաղաքների միությունը, Հունգարիայի տեղական իշխանությունների ազգային ասոցիացիան, Չեխիայի Ռադլոյի քաղաքապետարանը:

Նշենք, որ Հայաստանի համայնքների միությունը հուլիսի 15-ից սկսած տասնյակ վեբինարներ կազմակերպեց «Տեղական ինքնակառավարման արդիական իրավական հիմնահարցերը ՀՀ-ում», «Տեղական ինքնակառավարման Եվրոպական Խարտիան և տեղական ժողովրդավարության վիճակը Հայաստանում», «COVID-19․ Տեղական իշխանությունների համար առկա իրավական շրջանակները և պրակտիկ խնդիրները» թեմաներով: Սա այս շարքի վերջին վեբինարն էր:

Վեբինարների ընթացքում բարձր ակտիվություն և նախաձեռնողականություն դրսևորած ծրագրի կողմից ընտրված մասնակիցները ճանաչողական այցով կմեկնեն Լեհաստան ուսումնասիրելու տեղական փորձը: