Ուկրաինայի Գերագույն ռադայի ներկայացուցիչները՝ Հայաստանի համայնքների միությունում

20.11.2019

Նոյեմբերի 20-ին Հայաստանի համայնքների միություն այցելեց Ուկրաինայի Գերագույն ռադայի պետական իշխանության կազմակերպման, տեղական ինքնակառավարման, տարածքային զարգացման եւ քաղաքաշինության հանձնաժողովի քարտուղարության ղեկավար Անժելա Մալյուգայի գլխավորած պատվիրակությունը:

Ուկրաինայից ժամանած հյուրերը ներկայացրին, թե իրենց երկրում ինչ փուլում են ապակենտրոնացման գործընթացները, ինչ խնդիրներ կան տեղական ինքնակառավարման ոլորտում: Այնուհետև Հայաստանի համայնքների միության նախագահ Էմին Երիցյանին խնդրեցին ներկայացնել, թե Հայաստանում ինչ փուլում են ապակենտրոնացման գործընթացները, Միությունն ինչ դերակատարություն ունի տեղական ինքնակառավարման ոլորտին առնչվող գործընթացներում և արդյոք որոշումների կայացման հարցում Միության ձայնը լսելի է:

Էմին Երիցյանը ներկայացրեց, թե Հայաստանում ինչ օրենսդրական փոփոխություններ են տեղի ունեցել, տեղական ինքնակառավարման ոլորտում ինչ քաղաքականություն է տարվում: Հյուրերին հետաքրքրեց՝ արդյոք ՀՀ օրենսդրությամբ սահմանվա՞ծ են բավարար երաշխիքներ ապակենտրոնացման համար: Քննարկվեց նաև համայնքների՝ կենտրոնական իշխանություններից անկախության, նրանց ֆինանսավորման և լիազորությունների բաշխմանն առնչվող հարցեր:

Ուկրաինացի գործընկերներին հետաքրքրում էր՝ որքանո՞վ է արդյունավետ խոշորացման, համայնքների միավորման գործընթացը և արդյոք համայնքները միավորելիս հաշվի առնվո՞ւմ են դրանց աշխարհագրական դիրքն ու առանձնահատկությունները: Քննարկվեցին տեղական ինքնակառավարմանն առնչվող բազմաթիվ այլ հարցեր։

Ուկրաինացի հյուրերը կարևորեցին փորձի փոխանակման անհրաժեշտոթյունը և հայկական կողմին հրավիրեցին Ուկրաինա փոխայցերի:

ՆՈՐՈՒԹՅՈՒՆՆԵՐ

Հայաստանի համայնքների միության գլխավոր տնօրեն Արմեն Հարությունյանը մասնակցել է «Միջհամայնքային համագործակցության մասին» ՀՀ օրենքի նախագծի քննարկմանը