Հայաստանի համայնքների միությունը շարունակում է ներկայացնել, թե արտակարգ դրության օրերին ինչպես է ընթանում կյանքը Հայաստանի համայնքներում: «Համայնքներն արտակարգ դրության ժամանակ» խորագրով նոր նախաձեռնության շրջանակներում ներկայացնում ենք տեղեկություններ ՀՀ համայնքներում տիրող իրավիճակի և համայնքներում անցկացվող կանխարգելիչ միջոցառումների մասին: Ներկայացնում ենք, թե ինչ կանխարգելիչ ախտահանման աշխատանքներ են իրականացվում ՀՀ Տավուշի մարզի Իջևան քաղաքում:

Զրուցեցինք Իջևան համայնքի ղեկավար Հայկ Ղալումյանի հետ:

-Այս օրերին ինչպե՞ս է ընթանում համայնքային կյանքը Իջևան համայնքում, բնակիչները պահպանո՞ւմ են ինքնամեկուսացման կանոնները:

-Այս օրերին զգալի փոխված է Իջևան քաղաքի համայնքային կյանքը. քաղաքում չկա նախկին աշխուժությունը, մարդիկ տնից դուրս են գալիս խիստ անհրաժեշտության դեպքում: Մեր քաղաքի բնակիչները պահպանում են ինքնամեկուսացման պայմանները, հետևում են պարետի որոշումներին, լրացնում են տեղաշարժման համար նախատեսված թերթիկը, դուրս գալիս կրում են պաշտպանիչ դիմակներ և ձեռնոցներ:

-Համայնքում ի՞նչ միջոցառումներ են իրականացվում կորոնավիրուսի կանխարգելման համար:

-Համայնքի բոլոր թաղամասերը, շենքերի բակերը, մուտքերը, դռները, վերելակները, քաղաքի կանգառները, զբոսայգիները, փողոցներն ու մայթերն անընդհատ ախտահանվում են: Համայնքապետարանը ֆեյսբուքյան էջի և պաշտոնական կայքի միջոցով պարբերաբար իրականացնում է իրազեկման աշխատանքներ կորոնավիրուսի կանխարգելման նպատակով:

-Ի՞նչ ռեժիմով է աշխատում համայնքապետարանն արտակարգ դրության պայմաններում:

-Համայնքապետարանն աշխատում է արտակարգ ռեժիմով, քաղաքացիների սպասարկման գրասենյակը աշխատում է օնլայն, հեռավար եղանակով:

-Այս օրերին համայնքն ի՞նչ օգնության կարիք ունի:

-Ախտահանիչ նյութերի, դիմակների, ձեռնոցների, ալկոգելի կարիք կա համայնքում:

- Կա՞ մի առանձնահատուկ քայլ, որ միայն Իջևան քաղաքն է կիրառում կորոնավիրուսի կանխարգելման համար, կամ ի՞նչ հնարամտությունների եք դիմում, որպեսզի կարողանաք համայնքի ունեցած միջոցներով կազմակերպել այդ կանխարգելիչ աշխատանքները:

-Կարծում եմ` ոչ:

-Ձեր գնահատմամբ՝ համայնքներն այսօր պատրա՞ստ են դիմակայելու կորոնավիրուսին:

-Մեր համայնքում չկա արձանագրված դեպք, և մենք աշխատում ենք անել ամեն ինչ, որպեսզի բացառենք կորոնավիրուսի թափանցումը մեր համայնք: Ստեղծվել է համայնքային հանձնաժողով, որում ներգրավված են աշխատակիցներ արտակարգ իրավիճակների ծառայությունից, բուժմիավորումից, ոստիկանությունից, կոմունալ ծառայությունից: Հանձնաժողովն ամենօրյա աշխատանքային խորհրդակցություն է անցկացնում համայնքում տիրող իրավիճակը վերլուծելու և կանխարգելիչ միջոցառումներ ձեռնարկելու ուղղությամբ: