Մարտի 4-ին Երևանում անցկացվող «Քաղաքական բարեվարքությունը և էթիկան տեղական կառավարման համակարգում» խորագրով համաժողովին ՀՀ տարածքային կառավարման և ենթակառուցվածքների նախարարի տեղակալ Վաչե Տերտերյանը հայտարարեց, որ Եվրոպայի խորհրդի կողմից իրականացվող ծրագիրը լավ հնարավորություն է տալիս նախկինում ձեռնարկված գործողությունները զարգացնելու, շարունակելու, խորացնելու համար, ինչպես նաև ասաց, որ նոր մարտահրավերներ են մեր առաջ:

Նախարարի տեղակալը շնորհակալություն հայտնեց ԵԽ-ին երկար տարիներ տեղական ժողովրդավարության զարգացմանն աջակցելու համար. «Կարևոր է տեղական ժողովրդավարության կայացման հարցում հատկապես այն օժանդակությունը, որի շնորհիվ այս և այլ ծրագրեր կարողանում ենք իրականացնել: Վստահ եմ, որ Համայնքների միության հետ իրականացվող մեր ծրագիրը կունենա լավ արդյունք, ինչը կնպաստի և′ տեղական ժողովրդավարության, և′ Հայաստանի համայնքների ասոցիացիայի ինստիտուցիոնալ կարողությունների զարգացմանը, կառավարության և համայնքների միջև կայուն երկխոսության ամրապնդմանը և շատ խնդիրների լուծմանը, որոնք մեր ամենօրյա օրակարգում են և որոնք ամրագրված են Կոնգրեսի ինստիտուտցիոնալ հարաբերություններում և փաստաթղթերում»:

Երևանում անցկացված համաժողովը համախմբեց 23 տեղական ինքնակառավարման մարմինների ներկայացուցիչներին, տեղական ինքնակառավարման մարմինների քաղաքական բարեվարքության և էթիկայի աշխատանքային խմբի անդամներին, ազգային շահագրգիռ կողմերին՝ Տարածքային կառավարման և ենթակառուցվածքների նախարարությանը, Արդարադատության նախարարությանը, Ֆինանսների նախարարությանը, Կոռուպցիայի կանխարգելման հանձնաժողովին, քաղաքացիական հասարակության ներկայացուցիչներին՝ Բաց կառավարման գործընկերության քարտուղարությանը, Հայաստանի համայնքների միությանը և այլն:

Համաժողովի նպատակն է քննարկել տեղական ընտրված ներկայացուցիչների քաղաքական բարեվարքությանն առնչվող խնդիրները և նախանշել տեղական ինքնակառավարման մարմիններում հակակոռուպցիոն քաղաքականության իրականացմանն աջակցելուն ուղղված անհրաժեշտ քայլերը:

Համաժողովն իրականացվեց Եվրոպայի խորհրդի  տեղական և տարածքային իշխանությունների կոնգրեսի (Կոնգրես) կողմից «Հայաստանի համայնքների միաության հզորացում և թափանցիկ, մասնակցային տեղական ինքնակառավարումը Հայաստանում» ծրագրի շրջանակներում: Այն իրականացվում է Շվեյցարիայի զարգացման և համագործակցության գործակալության ֆինանսական աջակցությամբ՝ Եվրոպայի խորհրդի Տեղական և տարածքային իշխանությունների կոնգրեսի և Եվրոպայի խորհրդի երևանյան գրասենյակի կողմից՝ Եվրոպայի խորհրդի Հայաստանի համար իրականացվող գործողությունների 2019-2022թթ․ ծրագրի շրջանակներում: